Abagize Inteko Ishinga Amategeko bitabiriye imikino mpuzamahanga yahuje Inteko zishinga Amategeko zo mu bihugu bigize EAC, bashimiwe uburyo bitwaye neza ndetse bakegukana imidali n’igikombe.
Imikino mpuzamahanga ihuza Inteko zishinga Amategeko z’ibihugu byo muri EAC yabaye ku nshuro ya 14, yabereye i Mombasa muri Kenya, aho abarimo Depite Mukabalisa Germaine yegukanye umudali w’Umuringa mu gusiganwa metelo 800.
Ikipe ya Volleyball y’Abagabo y’Inteko Ishinga Amategeko y’u Rwanda nayo yahawe igikombe, ndetse n’indi midali itandukanye u Rwanda rwakuye muri iyi mikino.
Ku wa mbere, tariki ya 23 Ukuboza 2024, Umuyobozi w’Inteko Ishinga Amategeko y’u Rwanda, Umutwe w’Abadepite, Kazarwa Gertrude, yashimiye abitwaye neza muri iyi mikino ndetse abizeza ubufasha mu gushakirwa ibikoresho no kongera imyitozo.
Depite Mukabarisa wegukanye umudali w’umuringa yashimiye ubuyobozi bwabahaye icyizere cyo kubona ibikoresho birushijeho bizabafasha mu myitozo ndetse yizeza ko ubutaha bazegukana n’imidali ya Zahabu.
Ati” Abayobozi baduhaye icyizere ko imbogamizi z’ibikoresho zizakemurwa, bityo turumva bizagenda neza. Intego y’iyi mikino ni uguhuza n’ubufatanye bw’inteko zose kandi zigerwaho.”
Imikino nk’iyi ihuza Inteko zishinga Amategeko zo mu bihugu bigize umuryango w’Afurika y’Uburasirazuba, izongera kuba umwaka utaha, wa 2025, mu gihugu cy’u Burundi.
