Gufata ibyemezo bidakurikije amategeko byatumye Leta y’u Rwanda ijya mu manza n’abakozi ndetse itsindwa 23% byazo mu mwaka ushize wa 2025, yishyura asaga miliyoni 46 Frw arimo n’indishyi z’akababaro.
Raporo y’ibikorwa by’umwaka wa 2024/2025 ya Komisiyo y’ Igihugu ishinzwe Abakozi ba Leta (NPSC), igaragaza ko yakurikiranye imanza zirebana n’umurimo zaciwe, igasanga inzego za Leta 22 zaraburanye n’abakozi 45 mu manza 39.
Iyi raporo igaragaza ko Leta yatsinzwe imanza 9 zingana na 23% ,yishyura asaga Miliyoni 46,4 Frw arimo Miliyoni 30,6Frw z’indishyi z’akababaro.
Ni mu gihe yatsinze 30 zingana na 77%, ikishyurwa 8,200,000 Frw y’indishyi kubera gushorwa mu manza nta mpamvu.
Gufata ibyemezo bidakurikje amategeko byatumye amafaranga Leta yaciwe yiyongera kuko mu mwaka wa 2022/2023 yari Miliyoni 38,8 Frw.
Komisiyo y’Imibereho y’Abaturage mu Nteko Ishinga Amategeko, yasesenguye iyi raporo ibona imbogamizi zitandukanye, ririmo n’iyi.
Yagaragaje ko bamwe mu bashinzwe imicungire y’Abakozi ba Leta batanoza inshingano zabo mu micungire y’abakozi, bagafata ibyemezo bitubahirije amategeko abandi ntibahe abakozi ibyo babagomba ku gihe.
Iyi Komisiyo yasabye abayobozi b’inzego za Leta gufata ibyemezo byubahirije amategeko, ndetse mu gihe bibaye ngombwa bakagisha inama NPSC cyangwa izindi nzego bireba mbere yo gufata ibyemezo.
