Minisiteri y’Ubucuruzi n’Inganda yatangaje ko isukari u Rwanda rutumiza mu mahanga yagabanutseho 36.5% mu 2025, ndetse n’agaciro kayo kagabanukaho 39.1%.
Imibare ya Minisiteri y’Ubucuruzi n’Inganda igaragaza ko mu 2025 u Rwanda rwatumije toni 195,610 z’isukari zifite agaciro ka miliyoni 145 z’amadolari ya Amerika (asaga miliyari 212 Frw), bivuye kuri toni 308,000 zari zifite agaciro ka miliyoni 238 z’amadolari (asaga miliyari 348 Frw) zatumijwe mu 2024.
Isukari itumizwa mu mahanga irimo idatunganyije iza gutunganyirizwa mu nganda zo mu Rwanda, ikoreshwa mu gukora ibinyobwa n’ibiribwa, ndetse n’isukari itunganyije ikoreshwa mu ngo.
Minisitiri w’Ubucuruzi n’Inganda, Prudence Sebahizi, yabwiye ikinyamakuru The New Times ko iri gabanuka rishingiye ku mpamvu zitandukanye zirimo igabanuka ry’ubusabe bw’isukari itunganyije ku isoko ryo mu gihugu, kwiyongera k’umusaruro w’imbere mu gihugu, ndetse no kugabanuka kw’isukari yoherezwa mu bindi bihugu.
Yagize ati: “Igabanuka ry’ibitumizwa mu mahanga rishingiye ahanini ku kugabanuka kw’isukari ikoreshwa imbere mu gihugu, hamwe no kwiyongera kw’umusaruro w’imbere mu gihugu.”
Yanongeyeho ko kugabanuka kw’isukari yajyanwaga mu bindi bihugu, cyane cyane isukari mbisi yoherezwa gutunganyirizwa ahandi, na byo byagize uruhare muri iri gabanuka.
Nubwo mu 2025 habayemo igabanuka, mu 2024 isukari itumizwa mu mahanga yari yiyongereyeho 24% ugereranyije na 2023, aho agaciro kavuye kuri miliyoni 192 z’amadolari kakagera kuri miliyoni 238.
Minisiteri y’Ubucuruzi n’Inganda ivuga ko mu rwego rwo gukomeza kugabanya isukari itumizwa hanze, Guverinoma iri guteganya gutanga hegitari 8,000 zizahingwaho ibisheke, zizajya zitanga umusaruro wa nibura miliyoni 50 z’amadolari.
Ibi bizafasha kongera ubushobozi bwo gutunganya isukari imbere mu gihugu no kugabanya itumizwa hanze.
