sangiza abandi

Abameya icyenda bongeye gutorerwa kujya muri njyanama z’uturere bayoboraga

sangiza abandi

Abayobozi b’uturere icyenda bongeye gutorerwa kujya mu Nama Njyanama z’uturere bayoboraga, bibaha amahirwe yo kongera kwiyamamariza kuyobora utwo turere mu matora ateganyijwe ku wa 24 Ugushyingo 2026.

Aba ni Mukandayisenga Vestine wa Gakenke, Muzungu Gerald wa Karongi, Hategekimana Fred wa Kayonza, Rangira Bruno wa Kirehe, Niyonagira Nathalie wa Ngoma, Mupenzi Narcisse wa Nyamasheke, Mulindwa Prosper wa Rubavu, Sindayiheba Phanuel wa Rusizi na Kakooza Henry wa Nyagatare.

Batoranyijwe mu bajyanama rusange umunani batowe mu turere 27 tugize Intara enye z’u Rwanda, biyongera kuri batanu bahagarariye abagore bari bamaze gutorwa, mu rwego rwo kuzuza Inama Njyanama z’uturere.

Kongera gutorerwa muri izi nama ku bayobozi bari basanzwe bayobora uturere bibaha amahirwe yo kongera kwiyamamaza, kuko abagize Inama Njyanama ari bo bafite inshingano zo gutora abayobozi b’uturere n’ababungirije.

Biteganyijwe ko ku wa Kabiri, tariki ya 24 Ugushyingo 2026, ari bwo hazatorwa abayobozi b’uturere 27 n’ababungirije, bazayobora mu myaka itanu iri imbere.

Inama Njyanama z’uturere zifite inshingano zirimo kugenzura imikorere y’inzego nyobozi, gukurikirana ishyirwa mu bikorwa ry’ibyemezo by’iterambere, kwemeza gahunda z’iterambere n’ingengo y’imari y’uturere, ndetse no gufata ibindi byemezo bigamije guteza imbere imibereho y’abaturage.

Mu minsi ishize, abajyanama batanu bahagarariye abagore, bangana na 30% by’abagize Inama Njyanama, na bo bari bamaze gutorwa, mbere y’amatora y’abajyanama rusange yabaye mu turere 27.

Uturere 27 twatoye abagize Inama njyanama

Photos:

[fluentform id="3"]