Tariki 12 Gicurasi 1994 ni umunsi wa 36 mu minsi 100 Jenoside yakorewe Abatutsi yamaze, ukaba uwa 132 mu minsi igize umwaka. Kuri uyu munsi leta y’abicanyi yari ikomeje umugambi wayo mubisha wo gutsemba Abatutsi mu bice bitandukanye hirya no hino mu gihugu.
Ku munsi nk’uyu, tariki ya 13 Gicurasi 1994, ni yo yabaye itariki ya mbere y’ibitero simusiga byabaye mu Bisesero bigambiriye kwica Abatutsi.
Uwo munsi mu masaha ya saa tatu za mu gitondo nibwo ubwicanyi bwatangiye bugeza mu masaha ya saa kumi z’umugoroba.
Icyo gihe haje bus za ONATRACOM, za cammionnettes z’Abatutsi bari bishwe zasahuwe n’abicanyi, amakamyo ya COLAS yakoreshwaga mu kubaka umuhanda wa Kibuye-Gitarama n’izindi modoka ntoya harimo abayobozi, abasirikare barimo n’abari mu mutwe urinda umukuru w’igihugu n’interahamwe.
Abo bose bahise batangira kwica Abatutsi bo mu Bisesero aho bari bahungiye ku misozi ya Muyira na Gitwe, bari baramaze kunanirwa bikubitiraho n’uko ibitero byari bifite ingufu nyinshi ku buryo batashoboraga guhangana n’intwaro zikomeye byari byitwaje.
Abicanyi bagabye ibitero ku batutsi, bavuza induru ngo “Tubatsembatsemba”, barashe Abatutsi, babateramo za gerenade n’abandi bicanyi bakoresha intwaro gakondo, imirambo myinshi y’abana, abagore, abasaza yuzura aho.
Iki gitero cyaciye intege cyane Abasesero kandi cyicamo benshi, bivugwa ko uwo munsi hihwe Abatutsi barenga ibihumbi 30.
Uwo munsi ubwicanyi bwahagaze ahagana saa kumi n’imwe n’igice, abicanyi bahurira ahitwa ku Cyapa hagati ya Komini Gishyita na Gisovu, bategura uko ubwicanyi bwagombaga gukomeza ku munsi ukurikiyeho.
