Perezida wa Afurika y’Epfo, Cyril Ramaphosa, yahagamagaye kuri telefone Perezida Paul Kagame baganira ku ntambara iri mu Burasirazuba bwa Repubulika Iharanira Demokarasi ya Congo by’umwihariko mu Mujyi wa Goma.
Amakuru yatangajwe n’ibiro bya Perezida wa Afurika y’Epfo, Cyril Ramaphosa, ku mugoroba wo ku wa Mbere avuga ko yaganiriye na Perezida Kagame ku ntambara iri muri Kivu y’Amajyaruguru, ikomeje gupfiramo abasirikare b’Ingabo z’Umuryango wa Afurika y’Amajyepfo, SAMIDRC.
Ubutumwa bukomeza buvuga ko ibihugu byombi byemeranyije ku ngingo y’uko imirwano igomba guhagarikwa bidatinze, maze hakayobokwa inzira y’ibiganiro biganisha ku mahoro.
Ibi byashimangiwe na Minisitiri w’Ububanyi n’Amahanga w’u Rwanda, Amb Olivier Nduhungirehe watangaje ko ibiganiro byagenze neza kandi byitezweho gutanga umusaruro.
Ni ibiganiro bibaye nyuma y’uko Ihuriro ry’Abasirikare bo muri Afurika y’Epfo ritangaje ko abasirikare icyenda b’iki gihugu baguye mu mirwano bahanganye n’Umutwe wa M23 mu Burasirazuba bwa Congo.
Abasirikare ba Afurika y’Epfo ni bamwe mu ngabo z’Umuryango wa Afurika y’Amajyepfo (SAMIDRC) bamaze amezi atanu boherejwe mu Ntara ya Kivu gufatanya n’Igisirikare cya Congo n’indi mitwe mu kurwanya M23.
Perezida Ramaphosa ubwo aheruka mu Rwanda mu 2024, aho yari yitabiriye umuhango wo kwibuka ku nshuro ya 30 Jenoside yakorewe Abatutsi mu 1994 yaganiriye na Perezida Kagame bemeranya ko intambara iri mu Burasirazuba bwa Congo igomba guhagarara binyuze mu biganiro.
Nubwo hari habaye ibyo biganiro, Ingabo za Afurika y’Epfo zagumye mu Burasirazuba bwa Congo zifatanya n’Igisirikare cya Congo, FARDC n’indi mitwe irimo FDLR yifuza gukuraho ubutegetsi bw’u Rwanda, mu ntambara ihuriyemo na M23.
Ku mugoroba wo ku wa Mbere, ku mbuga nkoranyambaga hagaragaye amashusho yerekana ingabo za Afurika y’Epfo zizamura ibendera ry’umweru, risobanura ko zemeye kumanika amaboko cyangwa hakenewe agahenge.
