Umuvugizi Wungirije wa Guverinoma y’u Rwanda, Alain Mukuralinda, yatangaje ko abantu icyenda bahitanywe n’ibisasu byarashwe ku butaka bw’u Rwanda n’Ingabo za FARDC n’Umutwe w’Iterabwoba wa FDLR.
Yabitangaje kuri uyu wa Kabiri, tariki ya 28 Mutarama 2025, mu kiganiro Alain Mukuralinda yagiranye na RBA.
Alain Mukuralinda yatangaje ko ibi bisasu byarashwe mu Rwanda bimaze guhitana ubuzima bw’abantu icyenda, ndetse byasenye inzu eshanu z’abaturage.
Iyi mibare iri kugenda yiyongera nyuma y’uko ku wa Mbere, Umuvugizi w’Ingabo z’u Rwanda Brig, Gen Ronald Rwivanga, yari yatangaje ko abantu batanu bishwe n’ibisasu, abagera kuri 35 barakomereka nyuma y’amasasu yarashwe ku butaka bw’u Rwanda na FARDC na FDLR.
Alain Mukuralinda yakomeje avuga ko abandi bantu bagera kuri 681 bikanze urusaku rw’amasasu bo mu Mujyi wa Rubavu, bahungishirijwe mu Nkambi ya Kijote iri mu karere Ka Nyabihu.
Yakomeje ashimira abaturage b’u Rwanda bari mu Karere ka Rubavu, ku buryo bitwaye ku munsi wo ku wa Mbere ndetse abasaba gukomeza kumvira inama bagirwa n’ubuyobozi.
Yagize ati “Nk’uko twakunze kubivuga, mujye mwumva inama abayobozi babagira, baba aba gisirikare, baba aba gisivili, kuba barababwiye bati aha ngaha mwigireyo, bakigirayo, kuba barababwiye bati muri ano masaha, mugume mu nzu, mwikingirane bakabikora, ibyo ni byo gushimirwa.”
Yakomeje asaba Abanyarwanda kudakurwa umutima n’amakuru ari ku mbuga nkoranyambaga, y’uko hari abasirikare ba FARDC bari ku butaka bw’u Rwanda.
Ati “Nta musirikare wa FARDC, Wazalendo na FDLR wigeze winjira ku butaka bw’u Rwanda aje arwana.”
Kuri uyu wa Kabiri, Ingabo za FARDC n’iza Wazalendo zimaze guhungira mu Rwanda zirenga 130, zinjiye mu Rwanda zamburwa intwaro zose zijyanwa aho ziri gukurikiranwa n’Igisirikare cy’u Rwanda, mu bikorwa bitandukanye birimo no guhabwa ubuvuzi.
Mu basirikare ba FARDC bageze mu Rwanda barimo ufite ipeti rya Lieutenant n’undi ufite Sous Lieutenant na bo bahungiye mu gihugu nyuma yo gutoroka imirwano bahanganyemo na M23.
