Abacanshuro barenga 290 bo muri Romania barwanaga ku ruhande rwa Repubulika Iharanira Demokarasi ya Congo bahunze intambara ihanganishije Umutwe wa M23 n’Ingabo za RDC, FARDC, n’imitwe bifatanyije irimo FDLR na Wazalendo.
Aba bacanshuro bageze ku butaka bw’u Rwanda mu Karere ka Rubavu banyuze ku Mupaka Munini uzwi nka La Corniche, kuri uyu wa Gatatu, tariki ya 29 Mutarama 2025.
Bafashe icyemezo cyo gutaha nyuma y’iminsi itatu Umutwe wa M23 ufashe Umujyi wa Goma. Abaganiriye n’itangazamakuru bavuze ko bahunze kubera ko umutekano wabo utifashe neza ndetse hari umutekano muke muri Goma.
Aba bacanshuro bari bamaze imyaka muri RDC mu rugamba boherejwemo rwo kurwanya M23. Bari bararambagijwe n’Umunya-Romania Horațiu Potra uherutse no gutabwa muri yombi n’igihugu cye.
Bakigera mu Rwanda babanje gusakwa n’inzego z’umutekano ku ruhande rw’u Rwanda mbere yo kureba ibyangombwa byabo mu biro bishinzwe abinjira n’abasohoka.
Aba bacanshuro bahise bashyirwa muri bisi zabavanye mu Mujyi wa Rubavu zerekeza mu wa Kigali ku Kibuga Mpuzamahanga cy’Indege cya Kigali kiri i Kanombe aho biteganyijwe ko baza kuvanwa boherezwa mu bihugu byabo.
Mu gitondo cyo kuri uyu munsi kandi u Rwanda rwakiriye abakozi 40 ba Banki y’Isi bahunze intambara imaze iminsi hagati ya M23 na FARDC, Umutwe w’Iterabwoba wa FDLR n’indi mitwe bifatanya irimo na Wazalendo.
Kugeza ubu abarwanyi ba M23 ni bo bari kugenzura ibice bitandukanye bya Goma birimo n’umupaka ku ruhande rwa RDC nyuma yo gufata uyu mujyi.
