Kuri uyu wa 28 Gicurasi 2026, Polisi yo mu karere ka Nyamagabe ifatanyije n’ubuyobozi bw’umurenge wa Gasaka, bamennye ibinyobwa bitujuje ubuziranenge byagaragaye mu nyubako imwe yo mu kagari ka Nyabivumu, yavugwaga ko itunganyirizwamo kawunga.
Ibi binyobwa byafashwe nyuma y’igikorwa cyo kugenzura no kurwanya ibikorwa bishobora gushyira ubuzima bw’abaturage mu kaga, aho byagaragaye ko bitari byujuje ibisabwa mu rwego rw’ubuziranenge n’umutekano w’ibiribwa n’ibinyobwa.
Ibinyobwa byamenwe bingana na litiro zisaga ibihumbi 20, bikaba byajyanywe kumenwa mu kimoteri cy’akarere giherereye muri aka Kagari ka Nyabivumu.
Ubuyobozi bwibukije abaturage n’abakora ibikorwa by’ubucuruzi ko kubahiriza amabwiriza agenga ubuziranenge bw’ibicuruzwa ari inshingano za buri wese, bunasaba abaturage gukomeza gutanga amakuru ku gihe,mu gihe babonye ibikorwa bishobora guteza ingaruka ku buzima bw’abaturage.
