Inzego z’umutekano zo mu bihugu bigize Umuryango uhuza Abayobozi Bakuru ba Polisi mu Karere ka Afurika y’Iburasirazuba (EAPCCO), zasoje imyitozo ihuriweho yo kurwanya iterabwoba, yabereye mu Rwanda.
Iyi myitozo yabereye mu Kigo cy’Amahugurwa yo Kurwanya Iterabwoba (CTTC), kiri i Mayange mu Karere ka Bugesera, kuri uyu wa Kane tariki 28 Gicurasi 2026, mu muhango wayobowe na Minisitiri w’umutekano w’Imbere mu gihugu Dr. Vincent Biruta.
Ni umuhango waranzwe n’imyitozo itandukanye irimo iyo mu mazi n’ikorwa hifashishijwe indege, kunyura mu nzitizi, ndetse n’uburyo bwo guhangana n’ibitero by’iterabwoba hifashishijwe imbunda.
Minisitiri Dr. Biruta yasabye abasoje aya mahugurwa kuzakoresha ubumenyi bungutse kinyamwuga, barangwa n’imyitwarire myiza, kubaha amategeko ndetse n’amahame y’uburenganzira bwa muntu.
Yashimangiye ubushake buhuriweho bwo guteza imbere umutekano binyuze mu mahugurwa akozwe kinyamwuga, imikoranire y’akarere n’ubufatanye mpuzamahanga.
Umuryango wa EAPCCO ugizwe n’ibihugu 14 aribyo; u Rwanda, Uganda, Kenya, Tanzania, u Burundi, Ibirwa bya Comores, Ethiopia, Eritrea, Djibouti, Sudani, Sudani y’Epfo, Repubulika Iharanira Demokarasi ya Kongo, Seychelles na Somalia.
