Kuri uyu wa Gatanu umuyobozi mukuru wa Polisi y’u Rwanda, CG Felix Namuhoranye, yakiriye umuyobozi mukuru wa Polisi ya Kenya, Douglas Kanja Kirocho, hamwe n’itsinda ayoboye, ku Cyicaro Gikuru cya Polisi ku Kacyiru.
Muri uru ruzinduko, abayobozi bombi ba Polisi bashyize umukono ku masezerano y’ubufatanye hagati ya Polisi zombi, agaragaza intambwe ikomeye mu gushimangira ubufatanye hagati y’inzego zombi zishinzwe kubahiriza amategeko.
Aya masezerano ashyiraho urwego rw’imikoranire mu kurwanya ibyaha byambukiranya imipaka n’iterabwoba, icuruzwa n’ikwirakwizwa ry’ibiyobyabwenge, ikwirakwizwa ry’intwaro nto n’izoroheje, ibyaha byifashisha ikoranabuhanga, ndetse no guhanahana amakuru n’ubumenyi, amahugurwa, n’izindi gahunda zigamije kubaka ubushobozi bw’inzego zombi.
