Ingabo z’u Rwanda ziri mu butumwa bw’Umuryango w’Abibumbye bwo kubungabunga amahoro muri Repubulika ya Santarafurika (MINUSCA), zakiriye Umuyobozi mushya (Sector Commander) mu gice cy’Amajyaruguru ashyira Uburasirazuba, Brig Gen Hamad Mostafa Ahmed Adel Mansour.
Zamwakiriye ku cyicaro cyazo i Bria, kuri uyu wa Mbere tariki ya 1 Kamena 2026, aho yahawe ikaze n’Umuyobozi wa Rwanda Battle Group, Lt Col David Ngabonziza.
Brig Gen Mansour yagejejweho ishusho y’umutekano ihari muri iki gihe ndetse anasobanurirwa ibikorwa bya gisirikare biri gukorwa mu gace ingabo z’u Rwanda zishinzwe kurinda, hagamijwe kurengera abaturage.
Ashingiye ku bunararibonye afite mu butumwa bw’Umuryango w’Abibumbye bwo kubungabunga amahoro yakoreyemo mbere, aho yakoranye n’ingabo z’u Rwanda, Brig Gen Mansour yashimye imyitwarire yabo n’ubunyamwuga.
Yanabashishikarije gukomeza gukurikiza izi ndangagaciro mu gihe bakomeje gushyira mu bikorwa inshingano z’ubutumwa bwo kurinda abaturage.
