Abanya-Kenya bwitwaye neza mu Isiganwa Mpuzamahanga ry’Amahoro rya Kigali ryabereye mu Rwanda ku nshuro yaryo ya 21, aho begukanye Full Marathon mu bagabo no mu bagore ndetse na Half Marathon mu bagabo, ni mu gihe Umunyarwandakazi we yegukana Half Marathon mu bagore.
Muri iri siganwa ryakinwe iminsi ibiri, uwa kabiri waryo ni wo wakinwe n’ababigize umwuga kuri iki Cyumweru tariki 14 Kamena 2026, aho bakinnye mu byiciro bibiri, Full Marathon na Half Marathon mu bagabo no mu bagore.
Icyiciro cya Full Marathon cyakinwe ku ntera y’ibilometero 42, cyegukanywe n’Umunya-Kenya, Kephar Namutala mu bagabo akoresheje 2:14:19.
Yahise aba umukinnyi umaze gukoresha ibihe bito mu mateka y’iri siganwa, akuyeho agahigo kari gafitwe na Kibet Paul Kosjei bakomoka mu gihugu kimwe, wari wakoresheje 2:14:56 mu 2012.
Ni mu gihe mu bagore cyegukanywe n’Umunya-Kenya, Ivyne Jeruto, wakoresheje amasaha abiri, iminota 35 n’amasegonda 35 (2:35:35) na we wabaye ukoresheje ibihe bito mu mateka ya Marato Mpuzamahanga ya Kigali mu bagore.
Ku rundi ruhande, Umunya-Kenya Amos Kirui yegukanye Half Marathon yakinwe ku ntera y’ibilometero 22, akoresheje 1:04:16. Abaye umunya Kenya wa gatatu wegukanye umudari wa Zahabu muri iri siganwa rya 2026.
Umunyarwandakazi, Ibishatse Angelique ni we wegukanye iki cyiciro mu bagore, akoresheje isaha imwe, iminota 13 n’amasegonda 30 (1:13:30), akurikirwa na Mutuyimana Belthilde wakoresheje 1:13:54 na Tuyambaze Thabita wakoresheje 1:14:06, bituma aba banyarwandakazi biharira ibihembo bya Half Marathon bonyine.
Abakinnyi mu byiciro byombi bahagurikiye ndetse banasoreza imbere y’amarembo ya Stade Amahoro i Remera. Abasiganwa bakoresheje inzira imwe, abakina Half Marathon bayizenguruka rimwe mu gihe Full Marathon bayizengurutse kabiri.
Nyuma yo guhaguruka kuri Stade Amahoro banyuze kwa Lando bamanuka ku Gishushu (RDB) – Nyarutarama – MTN Nyarutarama – Akabuga ka Nyarutarama – Gishushu – KCC – UoK – Kacyiru – MINAGRI – USA Ambassador Residence – KABC – Kimihurura ku Kabindi – Primature Round About – Ku Kabindi – Kigali Heights – UoK – KCC –Gishushu – Chez Lando – Amahoro Stadium [Zigama Gate] – Kwa Rwahama – Simba Kimironko – KFC Kimironko – Contrôle Technique – BK Arena basoreza n’ubundi kuri Stade Amahoro.
Muri rusange, abakinnyi 518 babigize umwuga barimo abakina amasiganwa akomeye ku Isi ni bo bitabiriye Full Marathon, mu gihe 2,942 bakinnye Half Marathon muri iri rushanwa rizwi nka Kigali International Peace Marathon.
Isiganwa nyirizina ryabanjirijwe n’abasiganwa bishimisha ibizwi nka Run for Peace, ryabaye ku wa Gatandatu tariki 13 Kamena 2026, bikaba ari ubwa mbere iri siganwa rikinwe iminsi ibiri.
Kigali International Peace Marathon itegurwa n’Ishyirahamwe ry’Imikino Ngororamubiri mu Rwanda (RAF) ku bufatanye na Minisiteri ya Siporo mu Rwanda n’izindi nzego zitandukanye.
Abitabiriye iri siganwa ni abaturutse mu bigugu 65 byo ku migabane itandukanye birimo n’u Rwanda n’ibindi bituranyi nka Tanzania, Uganda, Kenya na Sudani y’Epfo.
