Minisitiri wa Siporo yatangaje ko Isiganwa Mpuzamahanga ry’Amahoro ryabereye i Kigali mu mpera z’icyumweru ryitabiriwe n’abasaga ibihumbi 9500 baturutse hirya no hino ku Isi.
Muri ibi bihumbi icyenda harimo 5,000 bitabiriye umunsi wa mbere wo gusiganwa mu batarabigize umwuga, aho birukanse ibilometero 10, n’abandi ibihumbi 4500 bitabiriye umunsi wa kabiri basiganwe Full Marathon y’ibilometero 42 ndetse na Half Marathon y’ibilometero 21.
Ku nshuro ya mbere mu myaka 20, iri rushanwa ryakinwe iminsi ibiri, Abanyarwanda batatu bitwaye neza biharira imidali yose yatanzwe muri Half Marathon.
Aba ni Ibishatse Angélique wegukanye umudali wa Zahabu mu gice cya Half Marathon akoresheje isaha imwe, iminota 13 n’amasegonda 30.
Yakurikiwe na Mutuyimana Berthilde yasize amasegonda 24 ahembwa umudali wa Feza na Tuyambaze Thabita wasizwe amasegonda 37 ahabwa umudali w’Umuringa.
Mu bindi byiciro, umunyakenya Kephar Lumbasi Namutala yegukanye Full Marathon mu bagabo naho Ivyne Jeruto yegukana Full Marathon mu bagore, aba bombi baca agahigo ko kwegukana iri rushanwa bakoresheje ibihe bito mu mateka y’iri rushanwa.
U Rwanda rufite intego yo kugera ku rwego rwa Gold Label
Iri rushanwa ryakinwaga ku nshuro ya 21 riri ku rwego rwa gatatu rw’amarushanwa akomeye ku Isi azwi nka Elite Label.
Minisitiri wa Siporo, Mukazayire Nelly, yavuze ko u Rwanda rwishimiye cyane uburyo Kigali International Peace Marathon igenda ikura, ndetse n’impano z’Abanyarwanda zikagenda zirushaho kugaragara.
Ati “Turamo turagenda tubona n’impano z’Abanyarwanda cyane cyane abakobwa, abari n’abategarugori batera imbere, biriya rero biragaragaza ko mu minsi iri imbere tuzaba dufata no mu byiciro byo kwiruka hose abakobwa bacu.”
Minisitiri Mukazayire akomeza ahamya ko bazakomeza gukuza impano bahereye ku z’abato kugeza ubwo bazaba bageze ku rwego nk’urwabaturanyi mu bihugu bya Kenya n’ahandi bafite abanyempano bakomeye mu gusiganwa muri Afurika.
Yakomeje avuga kandi ko u Rwanda rufite gahunda y’uko iri rushanwa ryazamurirwa urwego rigashyirwa ku rwa kabiri ruzwi nka Gold Label.
Ati ” Nibyo rwose, nabyo biri mubyo dutekereza.. tugomba gukomeza tuzamuka mu rwego ariko ntanubwo aribyo gusa tugomba gukomeza tuzamuka mu rwego, ni ukugirango birusheho kugenda neza.”
Minisitiri Mukazayire kandi avuga ko aba bakinnyi b’Abanyarwanda bazakomeza gukurikiranwa no kubashakira amahirwe yo kwitoza no guhatana ku rwego mpuzamahanga, no kubashoramo kugirango barusheho gukuza impano.
Ku ruhande rw’abasiganwa bagaragaje ko imyitozo n’uburyo bakurikiranwe mbere y’irushanwa byabafashije kwitwara neza muri iri siganwa nk’uko byagarutsweho na Ibishatse Angelique.
Ati ” Uyu mwaka by’umwihariko nari mfite intego yo kuyitwara. Batujyanye La Parisse Gashora niho twakoreye, twamenyereye izuba, ariko by’umwihariko twakoze imyitozo baradutegura n’abatoza buri kimwe cyose twarakibonye.
Rero gahunda twari dufite uyu munsi buri umwe wese byari ugukoresha imbaraga zazindi zanyuma zose ariko tukazamura idarapo ry’igihugu, zahabu igomba gutaha mu Rwanda.”
