Ikigo cy’Igihugu kibarurishamibare cyatangaje ko mu gihembwe cya mbere cya 2026 umusaruro mbumbe w’igihugu wazamutse ukagera kuri miliyari 6,346 Frw, uvuye kuri miliyari 5,276 Frw wari ho mu gihembwe nk’icyo cya 2025, bigaragaza izamuka rya 10%.
Raporo ya NISR, yashyizwe hanze kuri uyu wa Kabiri, tariki ya 16 Kamena 2026.
Iyi raporo igaragaza ko Urwego rwa serivisi rwakomeje kugira uruhare runini mu kuzamura ubukungu bw’igihugu, rungana na 52% by’umusaruro mbumbe wose, rukurikirwa n’ubuhinzi bwagize 19%, mu gihe inganda zatanze 24%. Imisoro itaziguye n’indi misoro ifitanye isano n’ibicuruzwa byagize 5%.
Urwego rwa serivisi na rwo rwagize uruhare rukomeye mu izamuka ry’ubukungu aho rwiyongeraho 7% ndetse rutanga amanota 3.9 ku izamuka rusange ry’umusaruro mbumbe. Ubucuruzi buranguza n’ubudandaza bwazamutseho 11%, mu gihe ubwikorezi bwazamutseho 11%.
Ikoranabuhanga n’itumanaho byiyongereyeho 22%, serivisi z’imari zazamutseho 11%, mu gihe ibikorwa by’ubuyobozi n’izindi serivisi zunganira ibikorwa by’ubukungu byazamutseho 20%.
NISR igaragaza ko mu nzego zose z’ubukungu, urwego rw’inganda rwagaragaje umuvuduko munini aho rwiyongeraho 13%, rukaba rwaragize uruhare rw’amanota 3.1 ku izamuka rusange ry’umusaruro mbumbe.
Muri uru rwego kandi ibikorwa by’ubucukuzi bw’amabuye y’agaciro na za kariyeri byazamutseho 20%, ubwubatsi bwiyongeraho 11%, naho ibikorwa by’inganda zitunganya umusaruro byazamutseho 15%.
NISR ivuga ko ubu bwiyongere bw’inganda buturuka cyane cyane ku izamuka rya 52% mu nganda zikora ibyuma, imashini n’ibikoresho, ndetse n’izamuka rya 57% mu nganda zikora ibikoresho bishingiye ku mabuye adafite ubutare.
Inganda zikora imiti, na pulasitiki zazamutseho 21%, mu gihe izikora ibikomoka ku biti, impapuro n’amacapiro zazamutseho 22%. Naho izikora ibikoresho byo mu nzu n’ibindi bikorwa zagabanutseho 6%.
Urwego rw’ubuhinzi, rwiyongereyeho 8% rutanga amanota 1.6 ku izamuka rusange ry’umusaruro mbumbe w’igihugu.
Umusaruro w’ibihingwa ngandurarugo wazamutseho 3%, mu gihe ibihingwa byoherezwa mu mahanga wazamutse ku kigero cya 39%, bigaragaza uruhare rw’ubuhinzi mu kwinjiriza igihugu amadovize.
Raporo ya NISR igaragaza ko hari inzego zimwe na zimwe zagaragaje igabanuka. Serivisi za hoteli na resitora zagabanutseho 16%, serivisi z’ubutegetsi bw’igihugu zigabanukaho 1%, naho urwego rw’ubuzima rwagabanutseho 18%.
Iyi mibare igaragaza ko ubukungu bw’u Rwanda bukomeje kwaguka bushingiye cyane ku nzego zirimo inganda, serivisi n’ubuhinzi, bikomeza gushyigikira intego y’igihugu y’iterambere rirambye no guhanga imirimo mishya.
