Ikipe y’Umurenge wa Masaka yegukanye ‘Umurenge Kagame Cup 2026’ mu mupira w’amaguru mu bagabo itsinze Nyarugenge ibitego 6-3 ku mukino wa nyuma, mu gihe mu bagore cyegukanywe n’Umurenge wa Mahembe yo mu karere ka Nyamasheke yatsinze Kacyiru penaliti 5-4.
Iyi mikino ya nyuma yabereye kuri Stade y’Akarere ka Bugesera kuri iki cyumweru tariki 21 Kamena 2026.
Ni imikino yitabiriwe n’ibihumbi by’abakunzi b’umupira bari buzuye stade, ndetse n’abayobozi mu nzego zo hejuru barimo Minisitiri w’Ubutegetsi bw’Igihugu, Habimana Dominique, Minisitiri wa Siporo, Nelly Mukazayire, Abayobozi b’intara n’umujyi wa Kigali, ab’uturere, inzego z’umutekano, n’abandi batandukanye.
Uyu murenge wa Masaka wo mu Karere ka Kicukiro,wahigitse uhigitse imirenge 416 yahatanye muri iri rushanwa, itsinze irusha cyane Nyarugenge mu mukino wabonetsemo ibitego 9 birimo 5 byabonetse mu gihe cya mbere kuko bagiye kuruhuka ari 4-1.
Mahembwe y’i Nyamasheke yagitwaye mu bagore, ni na yo yari ibitse icy’umwaka ushize wa 2025.
Imikino y’intoki yabereye kuri Imbuto Hub mu Karere ka Bugesera. Muri Basketball, Kicukiro BBC ni yo yegukanye Umurenge Kagame Cup 2026 itsinze Kamonyi BBC amanota 81-69 ku mukino wa nyuma.
Muri Volleyball, Kicukiro ni yo yegikanye iki gikombe mu bagabo itsinze Gasabo amaseti 3-0, mu bagore yegukanwa na Ngoma yatsinze Gicumbi amaseti 3-0.
Mu mikino ya Volleyball y’abafite ubumuga (Sitball), Gasabo ni yo yegukanye igikombe mu bagabo mu gihe Kirehe yacyegukanye mu bagore.
Iyi mikino yabanjirijwe n’iyo guhatanira umwanya wa gatatu yabaye ku wa Gatandatu tariki 20 Kamena 2026, aho mu bagabo wegukanywe n’Umurenge wa Rubengera wo mu karere ka Nyagatare, watsinze uwa Mbazi w’i Huye, ibitego 2-0.
Iri rushanwa ryitiriwe Perezida wa Repubulika y’u Rwanda, Paul Kagame kuva mu 2010, ryakinwaga ku nshuro yaryo ya 20, kuva ritangiye mu 2006.
AMAFOTO: MASAKA 6-3 NYARUGENGE
MAHEMBE 0-0 KACYIRU ( PEN: 5-4 )
Basketball
VOLLEYBALL
SIT BALL
