Kuri uyu wa mbere tariki 22 Kamena 2026, ikipe ya Rayon Sports yatangaje Umufaransa Hugo Tricarico nk’umutoza wayo mukuru mushya w’abazamu uzajya ufatanya na Ndayishimiye Eric “Bakame” warusanzwe muri izo nshingano.
Ibinyujije ku mbuga nkoranyambaga, Rayon Sports yatangaje uyu mutoza igira iti,”Tunejejwe no gutangaza Hugo Tricarico nk’umutoza mushya w’abanyezamu. Tricarico wakuriye muri OGC Nice, yari umutoza w’abanyezamu muri Vannes.”
Rayon Sports ikomeje urugendo rwo kwiyubaka yakomeje ivuga ko Ndayishimiye Eric “Bakame” wari usanzwe ari umutoza mukuru azaguma muri iyi kipe afatanya na Tricarico.
Tricarico yabaye umutoza wungirije mu ikipe ya FC Mougins / RC Grasse y’abatarengeje imyaka 18 na 19 hagati ya 2018-2020, aho yanatozaga abazamu ku munsi w’umukino.
Aha yahavuye yerekeza mu ikipe ya US Mandelieu yabayemo kuva muri 2020 kugeza muri 2023 aho yabaye umutoza w’abazamu b’amakipe y’abatarengeje imyaka 7-13 ndetse n’umutoza mukuru w’ikipe y’abatarengeje imyaka 7 n’ikipe y’abatarengeje imyaka 15.
Tricarico yavuye muri iyi kipe yerekeza mu ikipe ya FC Mougins yamazemo umwaka umwe nk’umutoza w’abazamu mbere yo kwerekeza mu ikipe ya Vannes Olympique Club ari nayo avuyemo mbere yo kwereza muri Rayon Sports.
