Umujyanama mu bya Gisirikare muri Misiyo Ihoraho y’ u Rwanda ku cyicaro gikuru cya UN, Col Deo Mutabazi, uyu munsi yahagarariye u Rwanda mu Ihuriro ry’Abafatanyabikorwa ba Gahunda yitwa Triangular Partnership Program (TPP) 2026, riri kubera i Hanoi muri Vietnam kuva ku wa 24 kugeza ku wa 26 Kamena 2026.
Ibiganiro by’iyi nama y’iminsi itatu bizibanda ku mikorere myiza, guhanga udushya no gushimangira ubufatanye.
By’umwihariko, bazasesengura uburyo bwo gukemura ibibazo bijyanye no kubaka ubushobozi n’imikoranire no kongerera ubushobozi inzego zishinzwe kubungabunga amahoro, ubwubatsi n’ubuvuzi, ndetse no gukumira ikoreshwa ry’ibisasu bitegwa.
Hazanarebwa uko ikoranabuhanga n’udushya bishobora gufasha mu gukemura izo mbogamizi.
Gahunda ya TPP ikorera mu Ishami rya Loni rishinzwe gushyigikira ibikorwa, kandi kuva mu mwaka wa 2015 iyi gahunda yabaye uburyo bw’ingirakamaro mu gutanga amahugurwa.
U Rwanda ni kimwe mu bihugu bigenerwa aya mahugurwa, rukaba no mu bafatanyabikorwa.
