Umuryango wa Afurika y’Iburasirazuba (EAC) wagaragaje ibyagezweho mu mwaka w’ingengo y’imari ushize wa 2025/26 mu nzego zitandukanye, harimo kuba ubukungu bw’akarere bwarazamutse ndetse n’ubucuruzi hagati y’ibihugu bigize uyu muryango bukaba bwariyongere.
Byagaragajwe ku wa 22 Kamena 2026, ubwo Umuyobozi w’Inama Nkuru ya EAC, Rebecca A. Kadaga, yamurikaga ingengo y’imari y’umwaka mushya wa 2026/27, ari na bwo hatangijwe ku mugaragaro Icyerekezo cya Karindwi cy’Iterambere cya EAC (2026/27–2030/31).
Ingengo y’imari yamuritswe ingana na miliyoni 110.9$ z’amadorali ya Amerika ivuye kuri miliyoni 109.05$ yakoreshejwe mu 2025/26.
EAC yagaragaje ko mu 2025/26, ubukungu bw’akarere bwazamutse ku kigero cya 5.8%, kiri hejuru y’impuzandengo y’isi iri kuri 3.4%. Ni mu gihe bucuruzi hagati y’ibihugu bigize EAC bwiyongereyeho 28% bugera kuri miliyari 19.3 z’amadolari ya Amerika.
Mu rwego rwa politiki n’umutekano, hongeye gutangira ibiganiro bigamije gushyiraho Ihuriro rya Politiki rya EAC, ndetse umuryango ukomeza gushyigikira ibikorwa byo kugarura amahoro mu burasirazuba bwa Repubulika Iharanira Demokarasi ya Congo.
Mu rwego rw’ubuzima, abarwayi barenga 12,500 bahawe serivisi z’ubuvuzi bwihariye binyuze mu bigo byo mu karere. Hanahuguwe abanyeshuri 785 barangije amasomo y’icyiciro cya gatatu cya kaminuza n’abarenga 3,300 bakora mu rwego rw’ubuzima.
Mu bikorwaremezo, umushinga wa East African Crude Oil Pipeline (EACOP) ugeze kuri 80% ushyirwa mu bikorwa.
EAC yanashyigikiye imishinga 16 y’urubyiruko ikoresha ubwenge buhangano(AI), mu gihe mu nzego zose z’umuryango byagaragaye ko raporo z’imari zemejwe nta makemwa, bigaragaza imiyoborere myiza n’ikoreshwa riboneye ry’umutungo.
