Ku mugoroba wo kuri uyu wa Gatanu ,ingabo z’u Rwanda (RDF) zahaye inka enye itsinda ry’abahanzi ryitwa Ubutwari Artists Group, riyobowe na Maria Yohani, zisohoza isezerano ryari ryaratanzwe n’umugaba mukuru w’ingabo z’u Rwanda (CDS), Gen MK Mubarakh.
Ni igikorwa cyakozwe mu rwego rwo gushimira uruhare rudasanzwe iri tsinda ryagize mu gukora ibitaramo bikangurira Abanyarwanda Ubutwari.
Ni igitaramo kizwi ku izina Ubutwari Concert .
Izo nka zashyikirijwe iri tsinda ku mugaragaro n’umuyobozi ushinzwe Imikoranire hagati y’ingabo n’abaturage, Col Désiré Migambi Mungamba, wari uhagarariye umugaba mukuru w’ingabo z’u Rwanda.
Uyu mu muhango wabereye ku ishuri ryitwa Kigali Infants School, mu murenge wa Rusororo ho mu karere ka Gasabo.
Ubutwari Artists group ni itsinda rigizwe n’abahanzi bazwi mu njyana gakondo harimo Mariya Yohani , Muryango n’abandi ritegura “Ubutwari Concert ” rikaba rishimirwa uruhare rigira mu kwimakaza umuco wo gukunda igihugu, ubudaheranwa , kubungabunga ubumwe bw’abanyarwanda n’indangagaciro z’ibanze binyuze mu njyana gakondo.
