Ikipe ya APR HC yatsinze ikipe ya Police HC ibitego 27-24 mu mukino wa kane w’imikino ya nyuma ya kamarampaka bituma amakipe yombi agwa miswi y’imikino 2-2.
Mu mukino wa kane w’imikino ya nyuma ya kamarampaka wabaye ku mugoroba wo kuri iki Cyumweru tariki 28 Kamena 2026, ikipe ya Police HC yasabwaga gutsinda igahita yegukana igikombe cya Shampiyona kuko yari iyoboye n’intsinzi y’imikino 2-1 ariko ntabwo byayikundiye.
Mu ruhererekane rw’iyi mikino ya nyuma, Police HC niyo yatangiye yitwara neza itsinda imikino ibiri ya mbere ku bitego 29-28 na 34-28.
APR HC ntiyigeze icika intege n’ubwo mu ruhererekane rw’imikino 5 iba iteganyijwe, Police HC yari isigaje gutsinda umukino umwe gusa igahita yegukana igikombe.
Mu mukino wa gatatu, APR HC yinyanye mu isunzu itsinda Police HC ibitego 31-25, none yongeye no kuyisubira iyitsinda mu mukino wa kane bituma amakipe yombi anganya intsinzi y’imikino 2-2, bivuze ko hagomba kwiyambazwa umukino wa 5 ari nawo wa nyuma kugira ngo hamenyekane ikipe yegukana igikombe cya Shampiyona y’u Rwanda ya Handball mu bagabo.
Umukino wa gatanu uteganyijwe kuri uyu wa Kabiri tariki 30 Kamena 2026 muri Petit Stade kuva saa kumi zuzuye z’umugoroba (16:00).
Ku rundi ruhande, umwanya wa gatatu wo wamaze kwegukanwa n’ikipe ya GS Tabagwe nyuma yo gutsinda Gicumbi HC imikino 2-0 ku bitego 35-26 na 28-24.
Mu guhatanira umwanya wa gatatu hari hateganyijwe gukinwa imikino 3 (Best of 3), hanyuma amakipe agatanguranwa gutsinda imikino 2.
