Nyuma y’igihe kinini abaturage b’akarere ka Nyanza basaba ko bakubakirwa gare nshya, kubera ko iyari isanzwe bavuga ko itajyanye n’igihe tugezemo, ubuyobozi bw’aka karere bwabamaze impungenge ko iyo gare iteganywa kubakwa bitarenze intagiriro z’umwaka utaha wa 2025.
Abakoresha iyo gare binubira ko ari ntoya kandi itajyanye n’igihe ukurikije aho u Rwanda rugeze n’ibikorwa remezo bigenda byubakwa mu tundi turere. Bavuga ko iyi gare iyo imodoka za kompamyi ebyiri zihuriyemo habura ubwinyagamburiro kubera ubuto bwayo, ndetse ko ibi bibabangamiye cyane.
Umuyobozi wa karere Ka Nyanza, Ntazinda Erasme, yatangaje ko rwiyemezamirimo uzubaka iyo gare yamaze kuboneka, hakaba hari gukorwa inyigo y’uko izubakwa nkuko bitangazwa na Kigali Today. Yavuze kandi ko ibi bikorwa bizabangikanywa n’ibyo kubaka isoko ry’aka karere naryo rinyotewe n’abaturage.
Ati “Kugeza uyu munsi gare n’isoko twabiboneye umushoramari, turi mu biganiro no gushaka uko yatangira kubaka. Twizera ko bitarenze umwaka utaha mu kwa mbere imirimo ishobora kuba yatangiye. Kuko igisigaye ni ugukora ku buryo abona ubutaka byemewe n’amategeko.”
Yongeyeho ko mu biri kuganirwaho mbere y’uko iyo mishinga itangira, harimo no kureba uburyo ikibanza yubatsemo cyajya mu maboko y’abikorera, kuko gisanzwe ari icya leta.Biteganyijwe ko iyo gare izuzura itwaye angana na miliyari 3 z’amanyarwanda, arimo no kwimura abaturage batuye aho izubakwa, ikazaba iri ku buso bwa hegitare imwe. Ni mu gihe inyigo y’isoko rigezweho rya Nyanza yakozwe igaragaza ko rizuzura ritwaye miliyari zirenga 3,4.
