Imyaka isaga itanu irashize amatara yo muri stade Umuganda, mu karere ka Rubavu, yimuriwe kuri stade ya Huye. Ibi abaturage basobanura ko byabateje igihombo gikomeye, ndetse bikabima uburyohe bwa ruhago dore ko ikunzwe n’abatari bake muri aka karere.
Mu kiganiro bamwe mu baturage bagiranye na RBA basobanura ko kuva iyi stade yakurwamo amatara akimurirwa kuri stade ya Huye batongeye kubona uburyohe bwa Ruhago, ndetse n’abacuruzi benshi bakaba barahahombeye.
Nirere Jean Paul yavuze ko ibyabaye kuri iyi stade bihabanye na gahunda ya leta y’u Rwanda yo kubungabunga ibyagezweho, ati “ Perezida Kagame aduha iyi stade yari mpuzamahanga dukiniraho na n’ijoro. Batwigisha ko dukwiye gusigasira ibyagezweho ariko bagafata stade imwe bakayisenyera mu yindi?”
Kirenga Alex nawe yongeraho ko kutabasha kwakira imikino ya nijoro hari igihombo byateje, ati “ Haramutse hari amatara hari abantu bagakwiye kuba baza, amafaranga avuye ku kibuga akaboneka ariko ubwo urumva ingaruka ntabwo zabura.”
Issa Habib ukinira muri stade nawe asobanura ko atari amatara gusa, kuko n’icyangiritse muri iyi stade biba ingorabahizi kugisana, ati “ Buri kantu kangiritse kuri iyi stade biragorana ngo bagasane rero turasaba akarere ko bakosora ibyo bintu kugira ngo babungabunge ibikorwa bya siporo.”
Umuyobozi w’akarere Ka Rubavu, Murindwa Prosper yasobanuye ko iki kibazo kizwi, kandi ko n’ikigo cy’Igihugu Gishinzwe Guteza Imbere Imiturire cyatanze isoko ry’amatara yagombaga gusimbura ayajyanywe i Huye.
Ati” Ikigo cy’Igihugu Gishinzwe Guteza Imbere Imiturire, cyatubwiye ko cyatanze isoko ryo kuzana amatara mashya kuko andi aho yagiye ntabwo bayakuraho ari gukora. Gufata neza ibikorwaremezo ni inshango za buri wese by’umwihariko akarere kuko iyi stade iri mu nshingano zacu.”
