Ikipe y’Igihugu y’u Rwanda y’abatarengeje imyaka 18 mu ngimbi yisanze mu itsinda rya mbere (A) hamwe na Misiri na Tanzania, mu gihe mu bangavu igomba gukina na Tanzania, Misiri na Kenya mu mikino y’akarere ka 5 yo gushaka itike y’Igikombe cya Afurika cy’abatarengeje imyaka 18, FIBA U18 AfroBasket 2026 Zone 5 Qualifiers, igiye kubera i Cairo mu Misiri.
Mu ijoro ryo kuri uyu wa Kane tariki 23 Nyakanga 2026, habaye inama itegura imikino yo gushaka itike y’Igikombe cya Afurika (Technical meeting) ari nayo yabereyemo tombola y’uko amakipe azakina mu matsinda mu ngimbi. Mu bangavu ho, amakipe 4 yitabiriye agomba guhura yose hagati yayo.
Mu ngimbi, amakipe 6 yitabiriye iyi mikino yagabanyijwe mu matsinda 2 y’amakipe 3. U Rwanda rwisanze mu itsinda rya mbere hamwe na Misiri yakiriye iyi mikino na Tanzania, naho itsinda rya kabiri ririmo Uganda, Sudani y’Epfo na Kenya.
Imikino iratangira kuri uyu wa Gatanu tariki 24 Nyakanga 2026, Uganda ikina na Sudani y’Epfo saa 15:30 naho Misiri ikine na Tanzania saa 18:00.
U Rwanda ruzakina umukino wa mbere kuri uyu wa Gatandatu saa 19:30 rukina na Tanzania.
Mu cyiciro cy’abangavu, amakipe 4 yitabiriye azazengurukana hagati yayo, kuri uyu wa Gatanu u Rwanda ruratangira rukina na Tanzania saa 13:00 ku isaha y’i Kigali, naho Misiri ikine na Kenya saa 20:30.
Amakipe azitwara neza muri iyi mikino y’akarere ka gatanu bizayahesha kubona itike yo kuzakina imikino y’Igikombe cya Afurika kizakinwa hagati ya tariki 5-16 Kanama 2026, kikazabara i Abidjan muri Côte d’Ivoire.
Ikipe ya mbere muri buri cyiciro niyo izahita ibona itike yo kuzakina Igikombe cya Afurika.
