Mu karere ka Kicukiro hafashwe litiro ibihumbi 385 z’ikinyabutabire cya Ethanol ndetse n’amakarito asaga 31,000 y’inzoga zitujuje ubuziranenge byari bikiri mu bibiko bw’inganda zirimo urwa Kasesa Distillers Distributors zikorera i Gahanga mu cyanya cy’inganda.
Iki gikorwa cyabaye kuri uyu wa Mbere tariki 10 Kanama 2026, muri gahunda ikomeje yo gukura inzoga zitujuje ubuziranenge mu baturage mu rwego rwo kwirinda ko zakomeza kugira ingaruka ku buzima bwabo. Ibi biri gukorwa ku bufatanye bw’inzego zitandukanye mu Mujyi wa Kigali n’ahandi.
Umuyobozi Nshingwabikorwa w’Akarere ka Kicukiro, Antoine Mutsinzi, yavuze ko ibyafatiwe mu nganda za Kasesa Distillers Distributors ndetse na Yego Manufacturing, bigiye gukurwa muri izo nganda kugira ngo bijyanwe ahabugenewe ndetse bikaba bigomba kwangizwa.
Yagize ati “Mu ruganda rwa Kasesa Distillers Distributors, hari harimo ingunguru 793 za ethanol zifite litiro ibihumbi 198, na zo turimo turazikuramo. Bari bafite n’amakarito y’inzoga zitujuje ubuziranenge agera ku bihumbi 28 yari mu bubiko na yo twafatiriye tugomba kujya kwangiza.”
Yakomeje avuga ko mu rundi ruganda rwa Yego Manufacturing ho hari harimo utugunguru twa ethanol 748 dufite litiro ibihumbi 187 na byo bigomba kwangizwa.
Yagize ati ” Muri izi nganda zombi hafashwe utugunguru twa ethanol dufite litiro ibihumbi 385 ndetse n’izoga nyinshi zaba izafatiwe muri izi nganda n’izifatiwe mu tubari n’ama butiki atandukanye.”
Inzego za Leta zikomeje gusaba abakora ibinyobwa bisembuye kubahiriza ibisabwa byose bijyanye n’ubuziranenge, ndetse abagaragaweho gukora ibitujuje ubuziranenge bakabikura ku isoko.
Nubwo hari abinangiye bakabihisha abandi bakabicuruzwa rwihishwa, aho bigaragaye biri gufatwa bikangizwa ndetse ababiri inyuma bagatabwa muri yombi.
Hagati ya tariki 2-5 Kanama 2026, na bwo mu Mujyi wa Kigali hakusanyijwe litiro zirenga ibihumbi 470 z’ikinyabutabire cya ethanol cyifashishwaga mu gukora inzoga zitujuje ubuziranenge ndetse zigomba kumenwa.
Ni mu gihe abaturage na bo bashishikarizwa kwirinda kunywa ibinyobwa bikekwa ko bishobora guteza ibyago ku buzima bwabo.
