Kuri uyu wa Kane tariki 20 Kanama 2026 harakinwa umukino wa mbere mu mikino ya nyuma ya kamarampaka muri basketball mu bagore aho REG W BBC ikina na The Hoops Rwanda saa 19:00 muri BK Arena.
Aya makipe yombi azatanguranwa gutsinda imikino 4 mu mikino 7 iba iteganyijwe mu mikino ya kamarampaka, Cheetah Energy RBL Playoffs 2025/26.
REG W BBC y’umutoza Mukaneza Esperance yageze ku mukino wa nyuma isezereye APR W BBC muri 1/2 nyuma yo kuyitsinda imikino 3-2, naho The Hoops Rwanda y’umutoza Habiyambere Patrick yageze ku mukino wa nyuma isezereye Kepler W BBC nayo iyitsinze imikino 3-2.
Muri iyi nkuru tugiye kugaruka ku cyo imibare ivuga kuri aya makipe mbere y’uko atana mu mitwe ahatanira igikombe cya Shampiyona y’u Rwanda ya basketball.
Icyo imibare ivuga mu mateka
REG Women BBC ni ikipe yashinzwe muri Nzeri 2021 nyuma yo kugura Ubumwe Basketball Club yari isanzwe ikina icyiciro cya mbere. Amasezerano impande zombi zari zagiranye yarangiye muri 2024 maze ikipe ya REG W BBC iba ikipe ya Sosiyete y’u Rwanda ishinzwe ingufu, REG, mu buryo bwuzuye.
Kuva iyi kipe yakwita REG imaze gutwara ibikombe 4 harimo na bibiri biheruka yatwaye muri 2024 na 2025, ibindi yabitwaye muri 2021 na 2022.
Ku rundi ruhande, ikipe ya The Hoops Rwanda ni ikipe yashinzwe muri 2013 yitwa irindi zina, yatangiye gukina Shampiyona y’u Rwanda yitwa The Hoops muri 2015.
Iyi kipe yari yashinzwe igamije kuzamura abana bakiri bato ariko ikaza guhindura umuvuno nyuma, yatwaye igikombe kimwe cya Shampiyona muri 2020, itsindirwa ku mukino wa nyuma inshuro 2 muri 2019 na 2021.
Aya makipe yombi atamaze igihe kinini ashinzwe ni ubwa kabiri agiye guhurira ku mukino wa nyuma w’imikino ya kamarampaka nyuma yo kuhahurira bwa mbere muri 2021.
Icyo REG yatsinze The Hoops imikino 2-1 kuko amakipe yatanguranwa gutsinda imikino 2 muri 3 yabaga iteganyijwe, maze REG yegukana igikombe cya Shampiyona ari nacyo cya mbere yari yegukanye nka REG.
Imibare yo mu mikino isanzwe ya Shampiyona (Regular Season)
Muri Shampiyona y’uyu mwaka, REG W BBC yarangije imikino isanzwe ya Shampiyona iyoboye n’amanota 28 mu mikino 14 bivuze ko yatsinze imikino yose uko yakabaye.
REG yinjije amanota 1225, yinjizwa amanota 773 bivuze ko yasoje Shampiyona yizigamye amanota 452.
Ushyize ku mpuzandengo, REG yinjizaga amanota 87.5 kuri buri mukino, ikinjizwa amanota 55.
Ku rundi ruhande, The Hoops Rwanda yarangirije ku mwanya wa gatatu ku rutonde rwa Shampiyona n’amanota 24 mu mikino 14, yatsinze imikino 10, itsindwa imikino 4.
The Hoops Rwanda yinjije amanota 936, yinjizwa amanota 857, irangiza Shampiyona yizigamye amanota 79.
Ushyize ku mpuzandengo, The Hoops Rwanda yinjizaga amanota 69 kuri buri mukino, ikinjizwa amanota 61.
Mu mikino ibiri yahuje aya makipe muri Shampiyona y’uyu mwaka yose REG yarayitsinze, umukino wa mbere REG yatsinze The Hoops amanota 91-51 naho mu mukino wa kabiri iyitsinda amanota 84-53.
Muri rusange iyi mibare igaragaza ko REG W BBC ari yo ifite amahirwe menshi yo kwitwara neza ku mukino wa nyuma.
Imibare yo mu mikino ya kamarampaka, Cheetah Energy RBL Playoffs 2025/26
Muri 1/2 cy’imikino ya kamarampaka, izi kipe zombi zakinnye imikino ingana, buri kipe yakinnye imikino 5 kuko buri kipe yatsinze imikino 3-2 kugira ngo igere ku mukino wa nyuma.
REG W BBC yatsinze APR W BBC naho The Hoops Rwanda itsinda Kepler W BBC yari yageze ku mukino wa nyuma mu mikino ya kamarampaka y’umwaka ushize wa 2025.
Mu mikino ya kamarampaka, REG yinjije amanota 413, yinjizwa amanota 397 bivuze ko yari yizigamye amanota 16. Ushyize ku mpuzandengo yinjizaga amanota 82 kuri buri mukino, ikinjizwa amanota 79.
Ku rundi ruhande, The Hoops yinjije amanota 262, yinjizwa amanota 262 bivuze ko nta nota yizigamye. Ushyize ku mpuzandengo yinjizaga amanota 52 kuri buri mukino n’ubundi nayo ikinjizwa amanota 52.
Abakinnyi bo kwitega
Ku ruhande rwa REG, bamwe mu bakinnyi bayo bameze neza bo kwitega ku mukino wa nyuma barimo Washington Delicia Ty’Rae wafashije bikomeye REG muri 1/2 aho muri buri mukino yatsinze amanota hejuru 17.
Abandi bakinnyi bo kwitega barimo Coulibaly Kankou, Uwimphuhwe Henriette, Kiyobe Chantal na Maiga Kadidia.
Ku ruhande rwa The Hoops bamwe mu bakinnyi bo kwitega barimo Feza Ebengo umaze gutsindira iyi kipe amanota 222 muri rusange, Cyuzuzo Rebecca, Mugisha Vivine Elisabeth na Ndaruhutse Atete Raissa wabaye mwiza mu mikino ya 1/2.
