Ikipe ya APR BBC yatsinze Patriots BBC amanota 94-87 mu mukino wa kabiri w’imikino ya nyuma ya kamarampaka, Cheetah Energy RBL Playoffs, wabaye kuri uyu wa Kane tariki 20 Kanama 2026 muri BK Arena.
Uyu mukino watangiye saa 21:30 ntabwo wari umeze nk’umukino wa mbere aho Patriots BBC yatangiye irushwa cyane, ahubwo kuri iyi nshuro yagerageje kwinjira mu mukino kare n’ubwo itabashije kugenda imbere ya APR BBC.
Agace ka mbere karangiye APR BBC iyoboye n’amanota 25-24 n’agace ka kabiri ikayobora ku manota 24-20 bituma amakipe yombi ajya kuruhuka APR BBC iyoboye n’amanota 49-44.
Mu gace ka gatatu, Patriots BBC yagatsinze harimo ikinyuranyo cy’inota rimwe gusa ku manota 21-20 mbere y’uko APR BBC itsinda amanota 25-22 mu gace ka kane, umukino ukarangira APR BBC itsinze amanota 94-87.
Leonard Craig Randall II wa APR BBC yongeye kuba itandukaniro kuri uyu mukino atsinda amanota 18, akora rebounds 2, atanga imipira 6 yavuyemo amanota ndetse akora n’ibihomo 3.
N’ubwo Patriots BBC yatsinzwe ariko Garba Chingka Kennedy yari yagize umukino mwiza kuko yatsinze amanota 26, akora rebounds 15, yambura umupira inshuro 1 ndetse akora ibihomo 4.
Muri uyu mukino APR BBC y’umutoza James Maye Jr yongeye kuba nziza mu gutsinda amanota 3 kuko yabikoze inshuro 15 mu gihe Patriots BBC y’umutoza Niyomugabo Munyandamutsa Sunny yabikoze inshuro 8, iki kikaba ari kimwe mu byatanze itandukaniro kuri uyu mukino.
Nyuma yo gutsinda uyu mukino, APR BBC irayoboye n’intsinzi y’imikino 2-0 mu mikino 7 iba iteganyijwe, amakipe akaba atanguranwa gutsinda imikino 4.
Si uyu mukino wabaye wonyine mu bagabo kuko habaye n’umukino wo guhatanira umwanya wa gatatu wahuje REG BBC na RSSB Tigers BBC.
Uyu mukino warangiye RSSB Tigers BBC yitwaye neza itsinda amanota 92-90 nyuma yo kwitwara neza kwa Manzi Dan ‘Kimasa’ watsinze amanota 17, akora rebounds 5, yambura umupira inshuro 4 ndetse atanga imipira yavuyemo amanota 3.
RSSB Tigers yahise iyobora n’intsinzi y’umukino 1-0 mu gihe biteganyijwe ko mu guhatanira umwanya wa 3 amakipe azatanguranwa gutsinda imikino 3 muri 5 iteganyijwe.
Ku wa gatandatu tariki 22 Kanama 2026 nibwo imikino izakomeza muri BK Arena, aho Patriots BBC na APR BBC zizatana mu mitwe mu mukino wa 3 mu ya nyuma ya kamarampaka saa 21:30 muri BK Arena, mbere yaho saa 16:30 RSSB Tigers na REG BBC zizaba zatanye mu mitwe mu mukino wa 2 mu yo guhatanira umwanya wa gatatu.
