Umunyamategeko wunganira Abarokotse Jenoside yakorewe Abatutsi, Gisagara Richard, yatangaje ko biteguye kuburana imanza ebyiri zikomeye z’abakekwaho ibyaha bifitanye isano na Jenoside yakorewe Abatutsi, ziteganyijwe imbere y’inkiko zo mu Bufaransa.
Imwe muri izo manza ni ubujurire bwa Charles Onana, umwanditsi w’ibitabo w’Umunya-Kameruni ufite n’ubwenegihugu bw’u Bufaransa, wakatiwe mu 2024 n’urukiko rwo mu Bufaransa kubera guhakana no gupfobya Jenoside yakorewe Abatutsi. Onana yahise ajuririra icyo cyemezo.
Gisagara Richard yavuze ko urubanza rw’ubujurire rwa Onana ruzaburanishwa ku itariki ya 2, 3 n’iya 9 Nzeri 2026. Yagaragaje ko biteze ko urubanza ruzaba rufite umwuka ukomeye, bitewe n’impaka zarushijeho gukaza umurego mu rubanza rwa mbere.
Yagize ati: “Urwa mbere ni urubanza rw’ubujurire rwa Charles Onana, muzi nk’umuntu wa mbere wakatiwe kubera icyaha cyo guhakana no gupfobya Jenoside yakorewe Abatutsi. […] Akaba yarahamwe n’icyo cyaha mu mwaka wa 2024 akajurira, rero ubujurire bwe tuzabuburana ku itariki ya 2, iya 3 n’iya 9 z’ukwezi gutaha kwa 9.”
Uyu munyamategeko yavuze kandi ko mu rubanza rwa mbere hari abagerageje kuyobya impaka bakazerekeza ku bibazo bya Repubulika Iharanira Demokarasi ya Congo, ariko urukiko rukanga ko izo mpaka.
Urundi rubanza bitegura ni urwa Madjaliwa Safari, ukurikiranweho kugira uruhare muri Jenoside yakorewe Abatutsi, by’umwihariko ku byabereye ahazwi nko ku Bigega mu karere ka Nyanza.
Safari Madjaliwa azaburana ku nshuro ya mbere, aho urubanza rwe ruteganyijwe kuva ku itariki ya 17 Ugushyingo kugeza ku ya 18 Ukuboza 2026. Gisagara yabwiye RBA ko biteganyijwe ko ruzamara ukwezi.
Gisagara yavuze ko aba ari bo babiri b’imanza z’ingenzi z’abakekwaho Jenoside yakorewe Abatutsi biteganyijwe ko bazaburanira mu Bufaransa muri iki gihe, kandi ko uruhande ahagarariye rwiteguye neza mu rwego rwo gushaka ubutabera nyabwo.
