Ikipe ya APR BBC yatsinze Patriots BBC amanota 101-92 mu mukino wa 3 w’imikino ya nyuma ya kamarampaka mu bagabo, Cheetah Energy RBL Playoffs, biyiha gutera intambwe igana ku gikombe cya Shampiyona.
Kuri uyu wa Gatandatu tariki 22 Kanama 2026, muri BK Arena habereye umukino wa 3 mu mikino 7 ya nyuma ya kamarampaka wahuje APR BBC na Patriots BBC kuva saa 21:30.
Uyu mukino watangiye amakipe yombi agendana mu manota aho agace ka mbere karangiye APR iyoboye n’amanota 21-20 ariko mu gace ka kabiri Patriots yitwara neza itsinda amanota 26-24.
Amakipe yagiye kuruhuka Patriots iyoboye umukino n’amanota 46-45.
Mu gace ka gatatu APR yitwaye neza itsinda amanota 35-22 ndetse ikinyuranyo yashyizemo muri aka gace nicyo cyashyize ikinyuranyo kuri uyu mukino kuko mu gace ka kane Patriots yatsinze amanota 24-21 ariko n’ubundi birangira APR itsinze amanota 101-92.
Marquise Teafale Lenard Jr yafashije cyane APR BBC ayitsindira amanota 29, akora rebounds 7, atanga imipira 3 yavuyemo amanota, yambura umupira inshuro 3 ndetse akora ibihomo 5.
Abandi bakinnyi ba APR y’umutoza James Maye Jr bitwaye neza barimo Leonard Craig Randall II watsinze amanota 26, William Robeyns Geralde watsinze amanota 18, Filer Jovon Adonis watsinze amanota 11 na Ntore Habimana watsinze amanota 10.
Gutsinda amanota 3 kenshi byongeye kuba intwaro ikomeye ya APR BBC imbere ya Patriots BBC kuko yabikoze inshuro 17 harimo inshuro 6 za William Robeyns Gerarlde watsinze buri buryo yagerageje.
Ku rundi ruhande, Patriots BBC y’umutoza Niyomugabo Munyandamutsa Sunny yatsinze amanota 3 inshuro 8 harimo inshuro 3 za Hubert Sage KWIZERA uri kwitwara neza muri iyi mikino ya kamarampaka.
Nyuma y’uyu mukino APR BBC yahise iyobora n’intsinzi y’imikino 3 bivuze ko isabwa gutsinda undi mukino umwe gusa igahita yegukana igikombe cya Shampiyona y’u Rwana ku nshuro ya kane yikurikiranya.
Uretse uyu mukino, muri BK Arena hanabereye umukino wo guhatanira umwanya wa gatatu hagati ya RSSB Tigers BBC na REG BBC.
Uyu mukino warangiye REG BBC itsinze amanota 78-54 bivuze ko amakipe yombi yahise anganya intsinzi y’umukino 1-1.
Aya makipe yombi azatanguranwa gutsinda imikino 3 mu mikino 5 iteganyijwe.
Ku wa mbere tariki 24 Kanama 2026 nibwo iyi mikino yombi izagaruka muri BK Arena, saa 16:40 REG BBC na RSSB Tigers zizatana mu mitwe mu mukino wa 3 wo guhatanira umwanya wa gatatu.
Nyuma y’uyu mukino hazakinwa umukino wa nyuma mu bagore mbere y’uko saa 21:30 APR BBC itana mu mitwe na Patriots BBC mu mukino wa kane ushobora no kuba uwa nyuma mu mikino ya nyuma ya kamarampaka.
