Rutahizamu w’Umanyarwanda Mbonyumwami Taiba yatangajwe nk’umukinnyi mushya w’ikipe ya Ethiopian Coffee SC yo muri Ethiopia nyuma yo gutandukana na Marine FC yakiniraga.
Ku wa 23 Kanama 2026 nibwo ikipe ya Ethiopian Coffee SC yerekanye abakinnyi 10 bashya izakoresha mu mwaka w’imikino wa 2026/27 barimo n’umunyarwanda Mbonyumwami Taiba wasinye amasezerano y’umwaka umwe mu muhango wabereye muri Inter Luxery.
Uyu muhango witabiriwe n’abayobozi b’iyi kipe ndetse n’abafana bahagarariye abandi wari ugamije gusezera ikipe no kuyifuriza amahirwe mu myiteguro igiye gutangira y’umwaka utaha kuri uyu wa Mbere tariki 24 Kanama 2026 mu Mujyi wa Adama ivuye mu murwa mukuru wa Ethiopia, Addis Ababa, ari naho isanzwe ibarizwa.
Mbonyumwami atangajwe n’iyi kipe nyuma yo kugira umwaka mwiza w’imikino muri Shampiyona y’u Rwanda, BK Pro League 2025/26, aho mu mikino 27 yakiniye Marine FC yayitsindiye ibitego 17, atanga imipira 5 yavuyemo ibitego, aba umunyarwanda watsinze ibitego byinshi ndetse ashyirwa no mu ikipe nziza y’umwaka.
Mbonyumwami ukinira ikipe y’Igihugu y’u Rwanda ‘Amavubi’ yavuzwe mu makipe menshi nyuma yo gutandukana na Marine FC arimo Police FC yo mu Rwanda ndetse n’amakipe yo hanze arimo ayo muri Zambia.
Ethiopian Coffee SC mu mwaka ushize w’imikino yasoreje ku mwanya wa 8 mu makipe 20 akina Shampiyona ya Ethiopia.
Ethiopian Coffee Sport Club inazwi nka Ethiopian Bunna yashinzwe mu 1976, ikaba ikinira imikino yayo kuri Addis Ababa Stadium yakira abafana ibihumbi 20.
Iyi kipe imaze kwegukana ibikombe bibiri bya Shampiyona mu mateka yayo, igikombe iheruka yagitwaye mu 2011, naho icya mbere yagitwaye mu 1997.
