Kuri uyu wa Gatatu taliki ya 26 Kanama 2026, i Dar es Salaam muri Tanzania hatangijwe ku mugaragaro ku nshuro ya gatandatu Icyumweru cy’ibikorwa by’ingabo z’Umuryango wa Afurika y’Iburasirazuba cyahariwe ubufatanye hagati y’Ingabo n’Abasivili (CIMIC).
Ni igikorwa kizageza ku wa 1 Nzeli 2026, kikaba cyibanda ku gutanga serivisi z’ubuvuzi, ubufasha mu by’ubutabazi ndetse no kuvugurura bimwe mu bigo nderabuzima byatoranyijwe.
Ingabo z’u Rwanda (RDF) zitabiriye iki gikorwa zohereje itsinda ry’abaganga n’abandi bakozi 20, riyobowe na Brig Gen Dr Jean Chrysostome Kagimbana.
Iri tsinda ryifatanyije n’ ‘abaganga baturutse mu Burundi, Kenya, Somalia, Uganda ndetse n’igihugu cyakiriye iki gikorwa cya Tanzania.
Mu muhango wo gutangiza iki cyumweru wabereye mu Kigo cya TPDF Lugalo Golf Club i Dar es Salaam, Lt Gen SH Othman, Umugaba Mukuru ushinzwe abakozi ku cyicaro gikuru cy’ Ingabo za Tanzania (TPDF), yagaragaje intego z’icyumweru cya CIMIC, zirimo gutanga serivisi z’ubuvuzi ku buntu ku baturage, imikoranire n’ubumwe hagati y’ibihugu bigize EAC.
