Ikigo gishinzwe Ibarurishamibare mu Rwanda (NISR), cyatangaje ko ubucuruzi bwakozwe hagati y’u Rwanda n’ibindi bihugu mu gihembwe cya kabiri cya 2026, bufite agaciro ka miliyari 3,429 Frw.
Imibare yashyizwe hanze na NISR ku wa Gatatu tariki 23 Nzeri 2026, igaragaza ko agaciro k’ubucuruzi hagati y’u Rwanda n’amahanga bwiyongereyeho 23.35% ugereranyije n’igihembwe cya mbere cya 2026.
Ibicuruzwa by’imbere mu gihugu u Rwanda rwohereje mu mahanga, byari bifite agaciro ka miliyali 806.19 Frw, mu gihe byatumijwe mu mahanga bifite agaciro ka miliyari Frw 2.359. Ibyongera koherezwa mu mahanga (re-exports) byo byari bifite agaciro ka miliyari Frw 263.73 Frw.
Muri icyo gihembwe, ibyoherezwa mu mahanga bikomoka imbere mu gihugu byiyongereyeho 58.65% ugereranyije n’igihembwe cya kabiri cya 2025, ubwo byari bifite agaciro ka miliyari 508.17. Ugereranyije n’igihembwe cya mbere cya 2026, byiyongereyeho 49.65%.
Ku rundi ruhande, ibicuruzwa u Rwanda rwatumije mu mahanga byiyongereyeho 28.78% mu gihembwe cya kabiri cya 2026 ugereranyije n’igihembwe nk’iki cya 2025, ndetse byiyongeraho 20.58% ugereranyije n’igihembwe cya mbere cya 2026.
Naho ibyongera koherezwa mu mahanga (re-exports) byiyongereyeho 26.11% mu gihembwe cya kabiri cya 2026 ugereranyije n’igihembwe nk’iki cya 2025, ariko bigabanukaho 7.35% ugereranyije n’igihembwe cya mbere cya 2026.
Ibihugu bitanu bya mbere u Rwanda rwoherezamo ibicuruzwa ni Ubushinwa, Leta Zunze Ubumwe z’Abarabu (UAE), Repubulika Iharanira Demokarasi ya Congo (DRC), u Buholandi (Netherlands) na Leta Zunze Ubumwe za Amerika (USA).
Ku bijyanye n’ibicuruzwa byasubiye hanze (re-exports), ibihugu bitanu bya mbere byabyoherejwemo ni Repubulika Iharanira Demokarasi ya Congo (DRC), Kenya, Ethiopia, Leta Zunze Ubumwe z’Abarabu (UAE) n’u Burundi.
Repubulika Iharanira Demokarasi ya Congo ni yo yakiriye 88.10% by’ibicuruzwa byose u Rwanda rwongeye kohereza mu mahanga.
