Intumwa z’u Rwanda zirimo abapolisi babiri bitabiriye imurikagurisha mpuzamahanga rya Milipol Qatar, ryibanda ku ikoranabuhanga n’ibikoresho bigezweho mu kurinda umutekano w’ibihugu n’abaturage.
Iri murikagurisha rya 16 ryatangiye ku wa 20 Ukwakira 2026, rikazageza ku wa 22 Ukwakira, ribera mu Mujyi wa Doha muri Qatar, muri Doha Exhibition and Convention Center.
U Rwanda ruhagarariwe na ACP Oscar Sakindi na ACP Eli Mberabagabo, bifatanyije n’abandi bitabiriye baturutse mu bihugu bitandukanye no mu bigo bikora ibikoresho n’ikoranabuhanga byifashishwa mu mutekano.
Milipol Qatar ni imurikagurisha mpuzamahanga riba buri myaka ibiri, rigamije kugaragaza ibisubizo bishya mu gucunga umutekano w’igihugu, kurinda abaturage no gufasha inzego zishinzwe kubahiriza amategeko gukora neza.
Mu byo iri murikagurisha ryibandaho harimo ikoranabuhanga rigezweho mu kugenzura umutekano, ibikoresho bya polisi, uburyo bwo gukumira ibyaha, ibikoresho byo kurwanya iterabwoba n’ibindi bisubizo bifasha inzego z’umutekano guhangana n’ibibazo bishya.
Iri rushanwa kandi ryitabiriwe n’amasosiyete arenga 270 yo muri Qatar no mu bindi bihugu, agaragaza ibikoresho n’ikoranabuhanga birimo drones, uburyo bwo kugenzura umutekano, umutekano wo kuri murandasi n’ibisubizo bifasha mu guhangana n’ibyago n’ibiza.
Ku nshuro ya 16, Milipol Qatar yanahuriranye n’inama mpuzamahanga y’i Doha yigaga ku ruhare rw’ubwenge buhangano (AI) mu mutekano, hagamijwe kureba uko ikoranabuhanga ryafasha inzego z’umutekano gukumira ibyaha no guhangana n’imbogamizi nshya.
Kwitabira iri murikagurisha biha abaryitabiriye umwanya wo kungurana ubumenyi, kumenya ikoranabuhanga rishya no gushimangira ubufatanye hagati y’inzego z’umutekano n’abakora ibikoresho byifashishwa mu kurinda umutekano.
