Ingabo z’u Rwanda ziri mu butumwa bw’amahoro bw’Umuryango w’Abibumbye muri Sudani y’Epfo (UNMISS) zegukanye ibihembo mu marushanwa y’umupira w’amaguru, volleyball no gusiganwa ku maguru, yabaye ku wa 24 Ukwakira 2026 mu rwego rwo kwizihiza Umunsi w’Umuryango w’Abibumbye.
Mu mupira w’amaguru, ikipe ya RWANBATT-3 yegukanye igikombe nyuma yo gutsinda ikipe ya UN House ibitego 3-0 ku mukino wa nyuma.
Mu marushanwa ya volleyball, ikipe ya RWANBATT-1 ni yo yegukanye igikombe, mu gihe RWANBATT-3 yabaye iya kabiri.
Ibihembo by’ayo marushanwa byatanzwe na Anita Kiki Gbeho, Intumwa Yihariye y’Umunyamabanga Mukuru w’Umuryango w’Abibumbye muri Sudani y’Epfo akaba n’Umuyobozi wa UNMISS, washimiye amakipe ku musaruro yagaragaje.
Ku rundi ruhande, abasirikare b’u Rwanda bagize umutwe wa RWANBATT-2, ukorera i Malakal mu Ntara ya Upper Nile, bitwaye neza mu irushanwa ryo gusiganwa ku maguru ryabereye ku cyicaro cya UNMISS.
Aba basirikare begukanye imyanya ya mbere, iya kabiri n’iya gatatu mu cyiciro cy’abagabo, biharira ibihembo byose byatanzwe muri icyo cyiciro.
Abasirikare begukanye ibihembo bambitswe imidari na Alfred Orano, Umuyobozi w’Ibiro bya UNMISS i Malakal, mu rwego rwo kubashimira umusaruro mwiza bagaragaje muri iri rushanwa.
Aya marushanwa yabaye umwanya wo guhuriza hamwe abakozi n’abasirikare bari mu butumwa bw’Umuryango w’Abibumbye muri Sudani y’Epfo, binyuze muri siporo, mu rwego rwo kwizihiza umunsi wahariwe uwo muryango.
