Mu igororero rya Nyamasheke kuri uyu wa Gatanu habereye umuhango wo gusoza amahugurwa y’ubumwe n’ubudaheranwa y’abagororwa bahamwe n’ibyaha bya Jenoside bagiye kurangiza ibihano.
Ni icyiciro cya munani cy’amahugurwa asanzwe aba yo gutegura abagororwa bahamijwe ibyaha bya Jenoside yakorewe Abatutsi bitegura kurangiza ibihano ngobasubire mu muryango nyarwanda.
Uyu muhango witabiriwe na Guverineri w’Intara y’Amajyepfo kuko 50% basubiye mu muryango nyarwanda ari abo muri iyo Ntara.
Mu ijambo rye yasabye aba bagororwa gukoresha inyigisho bahabwe mu gihe bamaze bahugurwa zirimo kubaha abandi,gukorera Igihugu no kurwanya amacakubiri n’ingengabitekerezo ya Jenoside.
Guverineri Alice Kayitesi yagize ati” Mu gihe mumaze muhugurwa mwahawe inyigisho zitandukanye zagarutse ku mateka y’u Rwanda, kuri Jenoside yakorewe Abatutsi, ku rugendo rw’Ubumwe, Ubwiyunge n’Ubudaheranwa, ku miyoborere myiza, ku mutekano, ku gushyira imbere Ubunyarwanda, ku kubana n’imiryango yanyu n’umuryango mugari ndetse no ku gukumira no kurwanya ingengabitekerezo ya Jenoside n’andi macakubiri.
Ibyo mwize bibabere urufatiro rwo gutangira ubuzima bushya bushingiye ku kuri, ku kwicuza, ku kubaha abandi no gukorera Igihugu.”
Intara y’Amajyepfo ifite umwihariko wo kuba ariyo ifite umubare munini w’abarangiza ibihano ku byaha bya Jenoside yakorewe Abatutsi aho muri iki cyiciro cyonyine ku bagororwa 644,abangana na 287 ari abo mu ntara y’Amajyepfo.
Ibi bifitanye isano n’ubukana Jenoside yakorewe Abatutsi yagize muri iyi ntara, aho Abatutsi benshi bishwe urw’agashinyaguro, ibikorwa remezo n’imiryango bigasenyuka, ndetse ingaruka zayo zikaba zikigaragara no kugeza uyu munsi.
Ni amahugurwa ategurwa ku bufatanye na Minisiteri y’ubumwe bw’abanyarwanda n’inshingano mboneragihugu (MINUBUMWE) n’Urwego rw’u Rwanda rushinzwe igorora (RCS),aho abarangije ibihano babanza kwigishwa mbere yo gusubira mu muryango nyarwanda.
