Abahinzi, abacuruzi, abashoramari ndetse n’abafatanyabikorwa baturutse hirya no hino muri Afurika no hanze yayo bateraniye i Kigali mu Rwanda, mu nama n’imurikagurisha mpuzamahanga ryiswe Africa Coffee & Tea Expo (ACT Expo) 2025, hagamijwe guteza imbere urwego rwa kawa n’icyayi binyuze mu kongera agaciro, guhanga udushya no kwagura amasoko.
Iri murikagurisha riri kubera muri Kigali Convention Centre kuva ku itariki ya 7 kugeza ku ya 8 Nyakanga 2025, ryitabirwa n’abarenga 500, barimo abarenga 150 bamuritse ubwoko butandukanye bwa kawa n’icyayi, bwo mu bihugu bitandukanye byo muri Afurika.
Iri murikagurisha riteguwe ku bufatanye bwa NAEB, Rwanda Convention Bureau na Rwanda Events, rikaba ryarahurije hamwe inzobere n’abakora muri uru rwego kugira ngo basangire ibitekerezo ku buryo bwo kongera umusaruro, ubuziranenge no gufasha abahinzi kugera ku masoko mpuzamahanga.
Intego ziri murikagurisha ni gushimangira uruhare rwa kawa n’icyayi mu iterambere ry’ubukungu bwa Afurika, guhuza abahinzi bato n’isoko mpuzamahanga, guteza imbere uburyo bwo gutunganya no gupfunyika ibikomoka kuri kawa n’icyayi, guhanga udushya no guteza imbere ubucuruzi bwambukiranya imipaka ndetse no kongera ubumenyi mu kumenyekanisha ibicuruzwa ku masoko y’i Burayi n’Amerika.
Donald Murphy, Umuyobozi wa Rwanda Farmers’ Coffee, yavuze ko iri murikagurisha ari amahirwe akomeye ku bahinzi bato kuko ryabahuje n’abaguzi baturutse mu mahanga, bikaba intambwe ikomeye mu kurwanya ubucuruzi bwiciriritse bushingiye ku bahuza.
Dr. Martin Luther Mawo, Umuyobozi wa Rwanda Mountain Tea, yashimangiye ko hakenewe kongerwa ubushobozi bwo gutunganya icyayi ku rwego mpuzamahanga, kandi ko “inkuru y’aho igicuruzwa cyaturutse n’uko cyatunganyijwe” ari ingenzi cyane mu kwinjira ku masoko y’i Burayi na Amerika.
U Rwanda rufite icyerekezo cyo guteza imbere ubuhinzi binyuze mu kongera ibyo rwohereza mu mahanga, cyane cyane kawa n’icyayi. Muri Gahunda ya NST2, igihugu gifite intego yo kongera umusaruro, kunoza ubuziranenge no kwagura amasoko mpuzamahanga.
Abategura iri murikagurisha batangaje ko ACT Expo izajya iba buri mwaka, ikazajya itanga urubuga ruhuza abahinzi, abacuruzi n’abashoramari bo muri Afurika nabo mu mahanga, hagamijwe kongera imikoranire, guteza imbere ishoramari no guhanga udushya.
