Abakinnyi ba APR FC bapimwe ibiyobyabwenge n’indwara zitandura

Kuri uyu wa Kabiri tariki 14 Nyakanga 2026, ikipe ya APR FC yakoze igikorwa cyo gupima abakinnyi bayo ibipimo bitandukanye by’ubuzima nk’uko bisanzwe bikorwa mbere y’uko umwaka w’imikino utangira ku bitaro bikuru bya Gisirikare i Kanombe.

Mu bipimo by’ubuzima abakinnyi bafashwe harimo umuvuduko w’amaraso, imikorere y’umutima, isuzuma ry’ibiyobyabwenge mu mubiri, ndetse n’ibindi bipimo by’ingenzi bigamije kumenya uko ubuzima bw’abakinnyi buhagaze.

Iki gikorwa cyo gupima abakinnyi gikorwa hagamijwe kwemeza ko abakinnyi bose bafite ubuzima buzira umuze bubafasha gutangira imyitozo n’amarushanwa bameze neza.

Ibi bibaye nyuma y’uko no mu minsi yashize, Ishyirahamwe ry’Umupira w’Amaguru mu Rwanda, FERWAFA, ryatangaje ko guhera mu mwaka w’imikino wa 2026/27, abakinnyi bazajya bakorerwa isuzuma ry’ubuzima ku buryo butunguranye hagamijwe kurwanya ikoreshwa ry’ibiyobyabwenge n’imiti itemewe yongerera imbaraga abakinnyi.