Abepisikopi n’abakirisitu Gatolika batuye n’abaturiye Ruyenzi, kuri iki Cyumweru bitabiriye umuhango wo gufungura ku mugaragaro Kiliziya nshya ya Ruyenzi iherereye muri Paruwasi ya Kabgayi, mu Karere ka Kamonyi.
Ni umuhango wayobowe n’abepiskopi Gatolika barimo Musenyeri Balthazar Ntivuguruzwa, Umwepiskopi wa Kabgayi; Musenyeri Visenti Harolimana wa Diyosezi ya Ruhengeri, ndetse na Musenyeri Smaragde Mbonyintege uri mu kiruhuko cy’izabukuru.
Uyu muhango witabiriwe n’imbaga y’abakirisitu baturutse mu bice bitandukanye, aho hatanzwe umugisha kuri iyi Kiliziya nshya hanasigwa amavuta ku nkuta, nk’umuhango wo kuyegurira Imana.
Musenyeri Ntivuguruzwa yashimye uruhare rw’abakirisitu n’Abapadiri b’Abamariyani bagize uruhare mu iyubakwa ry’iyi Kiliziya, abasaba gukomeza gushyira imbaraga mu murimo w’Imana.
Umushinga wo kubaka iyi Kiliziya wari waratangiye mu mwaka wa 2015, ubwo Musenyeri Smaragde Mbonyintege yashyiragaho ibuye ry’ifatizo tariki ya 15 Werurwe uwo mwaka. Ni mu gihe Paruwasi ya Ruyenzi yo yashinzwe ku itariki ya 18 Nzeri 2016.
Kiliziya ya Ruyenzi yubatswe mu gihe cy’imyaka 10, itwaye amafaranga asaga miliyoni 735 Frw. Abapadiri b’Abamariyani bagize uruhare rwa 53% mu kuyubaka, abakirisitu ba Ruyenzi batanga 43%, naho Diyosezi ya Kabgayi itanga 4%.
Ni Kiliziya ifite ubwiza butangaje imbere n’inyuma ndetse ikaba iri mu nziza ziri mu Rwanda, nubwo hagisigaye igice cyo gushyiramo intebe zisanzwe, kuri ubu hakirimo intebe za pulasitike.
Muri uyu muhango, abantu batandukanye bagize uruhare mu mushinga wo kubaka Kiliziya bashimiwe, banahabwa impamyabushozi z’ishimwe.
Umuhango washojwe n’isengesho ryo gushimira Imana no kuyegurira iyi nyubako nshya yitiriwe Mutagatifu Stanislas wa Yezu na Mariya.
