Abanyamuryango ba FPR Inkotanyi basuye Urwibutso rwa Jenoside yakorewe Abatutsi rwa Nyarubuye ruherereye mu Karere ka Kirehe, mu rwego rwo kwifatanya n’Abanyarwanda bose mu bikorwa byo Kwibuka ku nshuro ya 31 Jenoside yakorewe Abatutsi mu 1994.
Abanyamuryango ba RPF Inkotanyi basuye urwibutso rwa Nyarubuye ku wa gatanu, tariki ya 27 Kamena 2025.
Iki gikorwa cyiganje ku gushimira no guha icyubahiro inzirakarengane zazize Jenoside, ndetse no kongera gushimangira umuhate w’Umuryango wa FPR Inkotanyi mu kurwanya ingengabitekerezo ya Jenoside n’ihakana ryayo, no gukomeza uburezi ku mateka nyayo.
Umunyamabanga Mukuru w’Umuryango wa FPR Inkotanyi, Amb. Wellars Gasamagera, yibukije abitabiriye uyu muhango ko Ingabo zari iza RPA-Inkotanyi ziyobowe na Nyakubahwa Paul Kagame, Chairman wa FPR Inkotanyi, ari zo zatabaye zikanahagarika Jenoside, zibohora igihugu.
Amb. Gasamagera yashimangiye ko ari inshingano z’Abanyarwanda bose, cyane cyane abanyamuryango ba FPR Inkotanyi, kwigisha abakiri bato amateka nyakuri no kurwanya abapfobya bakanahakana Jenoside yakorewe Abatutsi.
Urwibutso rwa Nyarubuye ruruhukiyemo imibiri irenga 59,000 y’abazize Jenoside yakorewe Abatutsi, ni rumwe mu nzibutso zikomeye mu guhamya ukuri n’amateka y’ibyabaye mu Rwanda.
Uyu muhango wanabaye umwanya wo kuzirikana uruhare rw’ubuyobozi bwa FPR Inkotanyi mu kubaka ubumwe, ubumuntu n’amahoro mu Rwanda uyu munsi, hashingiwe ku ndangagaciro z’ubutwari, ukuri n’ubwuzuzanye.
