Ubushakashatsi bwa 7 ku mibereho n’ubuzima mu Rwanda (DHS7) bwerekanye ko abangavu bari hagati y’imyaka 15 na 19 baterwa inda biyongereye, bakagera kuri 8% mu 2025 bavuye kuri 5% mu 2020.
Ni ibikubiye muri bwo bushakashatsi bwamuritswe kuri uyu wa Gatatu tariki ya 17 Ukuboza 2025 n’Ikigo cy’Igihugu cy’Ibarurishamibare, NISR.
Ubu bushakashatsi bukorwa nyuma y’imyaka itanu, bugaruka ku bipimo bitandukanye birimo igwingira mu bana, uburumbuke bw’Umunyarwandakazi, kuboneza urubyaro, ubumenyi ku bwandu bwa virus itera SIDA.
Muri ubwo bushakashasti, abangavu batewe inda batarageze mu ishuri ni 21%, mu gihe abize amashuri abanza gusa ari 13%, abize ayisumbuye ni 4%.
Ubu bushakashasti bugaragaza ko abangavu batewe inda bafite imyaka 15 ari umuntu 1%, abatewe bafite imyaka 16 ni 2%, abatewe inda bafite imyaka 17 ni 6 % , abatewe inda bafite imyaka 18 ni 12% abatewe inda bafite imyaka 19 ni 20 %.
Minisitiri w’Ubuzima, Dr. Nsanzimana yavuze iki kibazo cyahagurukiwe n’inzego zitandukanye.
Yagize ati: “Ni ikibazo twiyemeje guhangana na cyo, iyi mibare iratwereka ibyabaye kuva mu myaka 5 ishize kuva mu 2020 kugera mu 2025, hari ingamba zashyizweho bizatugaragariza umusaruro nko mu mwaka utaha cyangwa ukurikira, harimo amategeko yavuguruwe, harimo kubegereza serivisi zifasha kugira ngo abana be kuva mu ishuri kuko bagize ikibazo cyo gutwita bakiri bato”.
Yakomeje agira ati “Umwana ubyaye akiri muto kenshi havamo abana bavuka batagejeje igihe, na ba nyina bakagira ibibazo babyara, bibagiraho ingaruka kwa muganga turabibona kenshi, hakiyongeraho n’abana bagwingira kuko imibare dufite igaragaza ko abana bagwingira abenshi bakomoka ku bana baba barabyaye bakiri bato.”
Minisiteri y’Uburinganire n’Iterambere ry’Umuryango ivuga ko abangavu 22.454 basambanyijwe bakanaterwa inda mu mwaka wa 2024, bigaragaza ko ari ikibazo gikomereye umuryango kigomba guhagurukirwa.
Imibare igaragaza ko mu 2020 abangavu 19.701 batewe inda, mu 2021 bariyongera bagera kuri 23.111, na ho mu 2022 bagera kuri 24.472 mu gihe mu 2023 bagabanyutseho gato bagera kuri 22.055.
