Abanyarwanda batuye mu mujyi wa Maputo muri Mozambique barasabwa gukomeza kwitwararika, kugirango batagirwaho ingaruka n’imyigaragambyo iri kubera muri uyu mujyi yakomotse mu matora ataravuzweho rumwe.
Aya matora yabaye mu Kwakira 2024, yegukanywe na Daniel Chapo w’ishyaka Frelimo ryari risanzwe riri ku butegetsi, gusa itsinzi ntiyakiriwe neza na mugenzi we bari bahanganye, Venâncio Mondlane wo mwishyaka rya Podemos.
Nyuma y’amatora hatangiye imyigaragambyo, yakurikiwe n’ibihuha bivuga ko ingabo z’u Rwanda zisanzwe zikora ubutumwa bwo kugarura amahoro muri Cabo Delgado, zaba ziri mu mujyi wa Maputo.
Ibi byatumye Leta y’u Rwanda isaba Abanyarwanda bariyo gukomeza kwigengesera kuko bishobora gutuma iyi myigaragambyo ibagiraho ingaruka.
Minisitiri w’Ububanyi n’Amahanga n’Ubutwererane, Ambasaderi Olivier Nduhungirehe, aherutse gutangaza ko Ambasade y’u Rwanda muri Mozambique yafunze iminsi ibiri yagateganyo, ndetse asaba Abanyarwanda kuguma mu ngo bakirinda icyabahungabanya.
Iyamuremye Jean Damascène, umuyobozi w’Abanyarwanda muri Mozambique, yabwiye IGIHE ko amakuru avuga ko ingabo z’u Rwanda ziri i Maputo ari ibihuha byazanywe naba rusahuriramunduru bashaka kwiba amaduka y’Abanyarwanda.
Raporo itangwa n’umuryango uharanira uburenganzira bw’ikiremwamuntu (Human Rights Watch) igaragaza ko abantu bagera kuri 30 bamaze kugwa muri iyi myigaragambyo, harimo batatu bapfuye tariki 6 Ugushyingo n’abakomeretse uwo munsi bagera kuri 66.
Kugeza ubu Abanyarwanda babiri bamaze gukomerekera muri iyi myigaragambyo barimo uwakubiswe ibuye mu mutwe n’uwahagaritswe apakiye ibicuruzwa bamuziza ko atagiye kwifatanya nabo.
Nubwo imyigaragambyo iri mu murwa mukuru wa Maputo itagambiriye gukorerwa Abanyarwanda, ariko barasabwa gukomeza gukurikiza amabwiriza bahawe n’Ambasade y’u Rwanda kugeza igihe ibibazo bikemutse.
