Abanyarwenya bo mu Bufaransa Muriel Robin na Anne Le Nen, bavuze ko basigiwe isomo n’urugendo bagiriye mu Rwanda ko ahari ubukungu atari ahaboneka zahabu gusa, ahubwo ahari ubuzima n’ibyishimo naho hari ubukungu buhahishe.
Ubu butumwa babucishije ku rubuga rwa Instagram ku cyumweru tariki ya 15 Nzeri 2024, bagaragaza ko urugendo rwabo rwabaye amateka, ndetse bakiranywe urugwiro bakaba barasanze abanyarwanda bihesha agaciro nabo bagomba kubibubahira.
Ubutumwa bugira buti “Twanejejwe cyane n’umutima mwiza twasanganye abantu. Ubudaheranwa bw’Abanyarwanda, urugwiro bakirana abantu byadukoze ku mutima. Umurava wabo no kwihesha agaciro bituma buri wese abashima kandi akabubaha.”
Aba banyarwenya bishimiye gusura pariki y’ingagi iherereye mu Birunga bagize bati “ “Twagize amahirwe adasanzwe yo gusura ingagi zo mu misozi miremire, kwitegereza ibyo binyabuzima byitonze, bikeye, bifite ubuzima bwiza ntibyari bisanzwe”.Â
Ibi byamamare byavuze ko hari amasomo menshi bigiye kuri uru rugendo, kuko usibye kuba hari amateka ya Dian Fossey wagize uruhare runini ngo ingagi zo mu birunga zitazimira ndetse n’ikigo cya Ellen DeGeneres gikora ubushakashatsi ku rusobe rw’ibinyabuzima byumwihariko ingagi. Ari n’agace kibutsa abantu ko ubukungu bw’isi butagaragarira muri Zahabu gusa.Â
Bati “Aha si ahantu habumbatiye amateka ya Dian Fossey, ni igicumbi kirinze ingagi, ahakangura abashakashatsi, igicumbi cy’amarangamutima nyakuri.
Tugarutse aha twahindutse. Hari ingendo zihindura imitekererezo n’icyerekezo cy’ahaboneka ubukungu mu Isi; ubukungu butabarirwa muri zahabu cyangwa amabuye y’agaciro ahubwo mu buzima dusangiye no guha agaciro ibyiyumviro by’umutima.”
