Abihayimana bo mu bihugu by’u Rwanda ,RDCongo n’u Burundi, kuri uyu wa 10 Ugushyingo 2025 bahuriye mu biganiro bigamije kwimakaza amahoro n’ubwumvikane mu baturage bo muri ibyo bihugu.
Ni ibiganiro by’iminsi ibiri, bibera i Kigali, byatangijwe na Komisiyo y’Ubutabera n’Amahoro mu nama y’abepiskopi Gatolika mu Rwanda (Commission Épiscopale Justice et Paix Rwanda),ibinyujije mu mushinga wayo “Amani Kwetu”.
Ibi biganiro byahuje abapadiri, ababikira hamwe n’abalayiki bakorera ubutumwa muri Komisiyo y’Ubutabera n’Amahoro, baturutse mu bihugu bitatu bihana imipaka aribyo u Rwanda, Repubulika Iharanira Demokarasi ya Congo (RDC) n’u Burundi.
Mu Rwanda, abitabiriye baturutse muri Diyosezi ya Cyangugu na Nyundo, mu gihe abaturutse muri Congo bavuye muri Bukavu na Goma, naho abo mu Burundi baturutse i Bujumbura na Ngozi – izi zose zikaba ari diyosezi zifitanye imipaka n’u Rwanda.
Umunyamabanga Mukuru w’Inama y’Abepiskopi Gatolika mu Rwanda no mu Karere k’Ibiyaga Bigari, Padiri Niragire Valens, yashimangiye ko uyu mushinga ari igikorwa gikomeye cyo kwimakaza amahoro n’ubufatanye mu bakirisitu n’abatuye muri aka karere.
Ati “Ibiganiro nk’ibi bigamije gutsimbakaza amahoro nk’uko umushinga ubivuga, Amani Kwetu, ni ukuvuga Amahoro Iwacu. Twumva ko abihayimana n’abasaseridoti bakorera ubutumwa mu bice bitandukanye bafite uruhare rukomeye mu kubaka amahoro arambye. Ni yo mpamvu tubashyize ku isonga muri uru rugendo rwo kuba ibiraro by’amahoro aho kuba inkuta zitanya abantu.”
Padiri Niragire yongeyeho ko uyu mushinga ufitanye isano n’umurongo mugari w’Abepiskopi Gatolika mu karere k’Ibiyaga Bigari mu gushimangira amahoro n’ubumwe mu baturage, by’umwihariko mu baturiye imipaka.
Ati “Akarere k’Ibiyaga Bigari kagizwe n’amoko atandukanye, ariko dufite umuryango umwe w’Imana. Tugomba gufasha abakirisitu kumva ko bahamagariwe kuba intumwa z’amahoro, guharanira gusenyera umugozi umwe no kurwanya amagambo n’ibikorwa byose bitanya abantu.”
Uyu mushinga “Amani Kwetu” uzibanda ku bikorwa byo guhuza abayobozi b’amadini, abanyamakuru n’abakoresha imbuga nkoranyambaga, kugira ngo bafatanye guhangana n’amagambo y’urwango no kwimakaza ibiganiro byubaka n’ubwumvikane mu baturage.
IVOMO: Kinyamateka
