Ihuriro rya AFC/M23 ryashyizeho guverineri mushya na visi guverineri wa Kivu y’Amajyepfo.
Ni mu itangazo ryashyizweho umukono na Bertrand Bisimwa ukuriye ibikorwa bya politiki muri iryo huriro, ku mugoroba wo kuwa gatatu tariki ya 11/06/2025.
Uwagizwe guverineri wa Kivu y’Amajyepfo ni Busu Bwa Ngwi Nshombo mu gihe umwungirije yagizwe Gadi Mukiza Nzabinesha.
Busu Bwa Ngwi Nshombo wahawe kuyobora kivu y’Amajyepfo yahoze ari umudipite akaba yari uwo mw’ishyaka rya UNC rya Vitala Kamerhe, yasimbuye kuri izi nshingano Emmanuel Birato wahinduriwe inshingano mu cyumweru gishize.
Naho Mukiza Gadi Nzabinesha wagizwe visi guverineri w’intara ya Kivu y’amajyepfo yari asanzwe ari burugumestri wa Komine ya Minembwe, akaba yagiye kuri uyu mwanya asimbuye Gasinzira Juvenali witabye Imana tariki ya 19 Gicurasi 2025.
Itangazo rikomeza rivuga ko iki cyemezo AFC/M23 yagifashe hagamijwe gukomeza ibikorwa by’ubuyobozi bw’iyi ntara, gushyira imbere amahoro, ubumwe no gukorera mu mucyo no kwegereza ubuyobozi abaturage.
Nubwo bimeze gutyo ariko iyi Kivu y’Epfo ifite guverineri wo ku ruhande rwa leta ya Congo, Jean Jacques Purusi ukorera mu mujyi wa Uvira.
