Al Hilal SC yo muri Sudani yatsinze Mouloudia Club d’Alger [MC Alger] yo muri Algeria ibitego 2-1, mu mukino wa mbere wo mu Itsinda C mu mikino yo guhatanira igikombe cy’amakipe yabaye aya mbere iwayo ( CAF Champions League).
Ni umukino wabereye kuri Stade Amahoro kuri uyu wa gatanu tariki ya 21 Ugushyingo 2025.
Ni ku nshuro ya mbere, mu Rwanda hari hakiniwe imikino y’amatsinda ya CAF Champions League, kuva Al Hilal SC yatangira kuza gukinira Shampiyona hano mu Rwanda, ni naho yahisemo kwakirira imikino yayo y’iri rushanwa.
Uyu mukino watangiye saa cyenda z’amanywa z’i Kigali, wayobowe n’Abasifuzi bo muri Ghana bayobowe na Charles Benile Bulu uri ku rwego mpuzamahanga, wari wungirijwe na Paul Atimaka na Theophilus Aberenga Akugre, mu gihe umusifuzi wa kane yari Bless Yao Selorm.
Ni mu gihe komiseri w’uyu mukino yari Murengerantwari Evariste w’i Burundi. Umunyarwanda François Regis Uwayezu we yari umuhuzabikorwa by’uyu mukino.
Ikipe ya Al Hilal itozwa na Laurentiu Aurelian Reghecampf, yatangiye irusha ikipe ya CM Alger igerageza gusatira kenshi.
Yakomeje kugerageza kurema uburyo ndetse iminota nka 20 ya mbere yarangiye imaze guhusha uburyo bubiri bwashoboraga kuvamo igitego.
Muri iyi minota kandi Ikipe ya MC Alger yari yamaze gukora impinduka, aho Merwane Khelif yasimbuye Ayoub Ghezala.
Mbere y’uko amakipe ajya kuruhuka, Ikipe ya Al Hilal SC yafunguye amazamu ku munota wa 45 w’umukino, ku gitego cyatsinzwe na Kapiteni w’iyi kipe, Abdelrazig Yagoub Omer.
Ni igitego abakinnyi ba Al Hilal SC bateguye bahererekanya umupira, ugeze kuri Omer Yagoub, usanga abakinnyi bo mu bwugarizi bwa MC Alger bahagaze nabi, ahita atsinda igitego.
Igice cya mbere cy’umukino cyarangiye iyi kipe yo muri Sudani yakiriye umukino, iyoboye n’igitego 1-0.
MC Alger yatangiye igice cya kabiri iri hejuru cyane ibanza guhusha uburyo bwari bwabazwe bw’igitego.
Ku munota wa 53 w’umukino, Oussama Benhaoua yishyuriye ikipe ye ya MC Alger, umukino kurushaho kuryohera ijisho, amakipe yombi anganya.
Umukino wongeye kugira igitutu cyo hejuru, aho buri kipe iri gushaka uko yatsinda igitego cya kabiri ngo ibashe kuyobora umukino.
Umukino winjiye mu minota 20 ya nyuma Al Hilal SC iri gusatira cyane ishaka icya kabiri.
Ku munota wa 75 w’umukino, Mohamed Yagub Abdelrhman Yousif wari winjiye mu kibuga asimbuye, yahise atsinda igitego cya kabiri ku mupira wa mbere yari akozeho.
Mu minota ya nyuma, CM Alger yahushije uburyo bwari bwabazwe bwashoboraga kuvamo igitego cyo kwishyura
Nyuma yo gusoza iminota 90 isanzwe ndetse n’indi irindwi y’inyongera ikiyoboye umukino, Al Hilal SC yo muri Sudani yahaye ibyishimo imbaga y’abanya- Sudani bari baje ku bwinshi, ikura intsinzi imbere ya MC Alger yo muri Algeria itozwa na Mlungisi Rhulani Mokwena, n’ibitego 2-1.
Nyamara iyi minota y’inyongera bayikinnye ari 10, kuko Salah Eldin Adil Ahmed Al Hassan wa Al Hilal SC yahawe ikarita y’umutuku nyuma yo guhabwa ebyiri z’umuhondo.
Umukino wasojwe n’imvuruu zatejwe n’abakinnyi ba CM Lager, bashakaga gukubita umukinnyi wa Al Hilal, ariko inzego z’umutekano zirimo Polisi y’u Rwanda zirahagoboka, abakinnyi basubira mu rwambariro amahoro.
Mu mikino ibiri yaherukaga guhuza aya makipe, muri Mutarama 2025, yari yanganyije igitego 1-1, mu gihe mu 2024, Al Hilal Omdurman SC yari yatsinze MC Alger igitego 1-0.
Imikino yo guhatanira igikombe cy’amakipe yabaye aya mbere iwayo, igeze mu matsinda aho, amakipe 16 agabanyije mu matsinda 4.
Itsinda C ririmo Al Hilal SC yo muri Sudani izajya yakirira kuri Stade Amahoro, ririmo andi makipe akomeye nka Mamelodi Sundowns yo muri Afurika y’Epfo, MC Alger yo muri Algeria na St Éloi Lupopo yo muri Repubulika Iharanira Demukarasi ya Congo.
Al Hilal irakomereza akazi muri Shampiyona y’u Rwanda aho izacakirana na Police FC iyoboye iyi Shampiyona, mu mukino uzabera kuri Stade Amahoro, ku wa gatatu tariki ya 26 Ugushyingo 2025, saa kumi n’ebyiri z’umugoroba (18h : 00).
