Ikipe ya APR FC yatangaje ko yasinyishije Hakim Kiwanuka na Denis Omedi bari basanzwe bakinira Ikipe y’Igihugu ya Uganda.
Ibinyujije ku rubuga [website] rwayo, APR FC yemeje ko Hakim Kiwanuka na Denis Omedi ari abakinnyi bayo bashya kuva mu gice cya kabiri cya Shampiyona y’u Rwanda.
Hakim Kiwanuka w’imyaka 24 yasinyiye APR FC avuye muri Villa Sports Club ndetse yayifashije kwegukana Igikombe cya Shampiyona ya Uganda mu 2023/2024.
Uyu mukinnyi usatira izamu ni we watsindiye Uganda igitego rukumbi cyabonetse mu mukino wa nyuma w’ijonjora rya CHAN2024 wabereye muri Nakivubo Stadium.
Mu mikino 15 yari amaze gukinira Villa Sports Club muri uyu mwaka w’imikino, muri Shampiyona ndetse na CAF Champions League, Hakim Kiwanuka yatsinzemo ibitego bitanu, anatanga imipira ine yavuyemo ibitego.
Hakim Kiwanuka wari umaze umwaka n’igice muri Villa Sports Club, yakiniye Proline FC imikino 20, ayitsindira ibitego bitatu, anatanga imipira itandatu yavuyemo ibitego.
Undi mukinnyi wasinyishijwe na APR FC ni Denis Omedi, ufite agahigo ko kuba mu bakinnyi 10 batsinze ibitego byiza ku Isi byatoranyijwemo icyegukanye igihembo.
Uyu rutahizamu wakiniraga Kitara FC muri Uganda yavutse ku itariki 13 Kamena 1994.
Denis Omedi yatsindiye Kitara FC ibitego 14 muri Shampiyona ya 2023/2024, atsindira Uganda Cranes ibitego mu mukino wayihuje na Afurika y’epfo ndetse n’uwo yakinnye na Sudani y’Epfo. Ni na we wahesheje Uganda itike yo kujya mu mikino ya nyuma y’Igikombe cya Afurika (AFCON).
Igitego yatsinze KCCA muri Shampiyona ya Uganda, muri Kanama 2024, cyari mu bitego 11 byiza byatoranyijwemo icyahize ibindi mu bihembo bya ‘FIFA Puskás Awards’, cyaje kwegukanwa n’icya Alejandro Garnacho ukinira Manchester United.
Muri ibi bihembo, igitego cye cyabaye icya gatatu n’amanota 16 mu gihe mu bihembo by’umwaka bya CAF, cyabaye icya gatandatu.
