Ikipe ya RSSB Tigers ihagarariye u Rwanda yatsinze Johannesburg Giants yo muri Afurika y’Epfo, amanota 102 kuri 89, mu mukino wa Gatatu wa BAL muri Conference ya Kalahari.
Ku mugoroba wo kuri uyu wa Gatatu, i Pretoria muri Afurika y’Epfo ni bwo RSSB Tigers yakinnye umukino wayo wa gatatu mu mikino ya BAL conference ya Kalahari.
RSSB Tigers yagiye gukina uyu mukino imeze neza cyane kuko yatsinze imikino ibiri, ibanza irimo uwo yatsinze Al Ahly yo muri Libya ndetse n’uwo yatsinze Petro Atletico yo muri Angola.
Umukino wo kuri uyu wa Gatatu, ntabwo wigeze ugora abasore ba RSSB Tigers kuko agace ka mbere bagatsinze amanota 28 kuri 18, agace ka kabiri bagatsinda ku manota 25 kuri 24 ya Johannesburg Giants, bongera gutsinda agace ka gatatu ku manota 24 kuri 20 ya Johannesburg Giants, ni mu gihe agace ka nyuma karangiye RSSB Tigers ifite amanota 25 kuri 27 ya Johannesburg Giants, ariko igiteranyo cy’amanota yose kigasiga abasore ba RSSB Tigers begukanye instinzi n’amanota 102 kuri 89.
Nyuma yo gutsinda uyu mukino RSSB Tigers yahise ikatisha itike yo gukina imikino ya nyuma ya BAL, izabera i Kigali, muri BK Arena muri Gicurasi 2026.
Kuri ubu ikaba ariyo iyoboye itsinda ry’amakipe atandatu arimo gukina imikino ya BAL muri conference ya Kalahari.
RSSB Tigers iyoboye itsinda ry’amakipe atandatu arimo gukina imikino ya BAL muri conference ya Kalahari
Amashusho y’uburyo RSSB Tigers yakatishije itike yo gukina imikino ya nyuma ya BAL izabera i Kigali
