Ambasaderi w’u Rwanda mu Buyapani, Marie Claire Mukasine, yashyikirije Umwami wa Thailand, Maha Vajiralongkorn Phra Vajiraklaochaoyuhua (Rama X), impapuro zimwemerera guhagararira u Rwanda muri icyo gihugu.
Uyu muhango wabaye kuri uyu wa mbere, tariki ya 22 Nyakanga 2025, wabereye ku Ngoro ya Amphorn, i Bangkok.
Mbere yo gushyikiriza Umwami wa Thailand, impapuro zimwemerera guhagararira u Rwanda muri icyo gihugu, Amb. Marie Claire Mukasine yahuye n’Umunyamabanga muri Minisiteri y’Ububanyi n’Amahanga y’Ubwami bwa Thailand, Natthira Krasaesarn.
Ambasaderi Mukasine asanzwe afite icyicaro i Tokyo mu Buyapani.
Mu butumwa yagejeje ku Mwami wa Thailand, Ambasaderi Mukasine yamushyikirije indamukanyo ya Perezida wa Repubulika y’u Rwanda, Paul Kagame. Anagaragaza ko u Rwanda rwiteguye gukomeza umubano mwiza n’ubufatanye na Thailand mu by’ubukungu, umuco n’iterambere rusange.
Umwami Rama X yakiriye Ambasaderi Mukasine, amwizeza ko Thailand yiteguye gukomeza gutsura umubano n’u Rwanda hashingiwe ku ndangagaciro rusange, ubufatanye n’ubwumvikane.
Amb. Mukasine yahuye n’Umunyamabanga Uhoraho Wungirije muri Minisiteri y’Ubucuruzi ya Thailand, Ekachat Seetavorarat, bagirana ibiganiro bigamije guteza imbere ubufatanye mu bijyanye n’ubucuruzi, ishoramari, ingufu zisubira, gutunganya umusaruro w’ubuhinzi, umuco na serivisi z’ubukerarugendo.
Yanakiriwe kandi na Minisitiri w’Ubutabera wa Thailand, bashimangira amasezerano y’ubufatanye asanzweho, ndetse anashimira ubufasha Thailand yatanze mu gusubiza mu gihugu Abanyarwanda 10 baherutse guhugurwa.
Asoza uruzinduko rwe, Ambasaderi Mukasine yahuye n’Abanyarwanda baba muri Thailand, abasaba gukomeza kugira uruhare mu iterambere ry’igihugu, kandi abasaba gukomeza kugirana umubano hagati yabo.
