Anita Pendo uri mu banyamakuru bakunzwe mu myidagaduro y’u Rwanda, yasobanuye ko iki gisate kitorohewe mu byo yise ko kuyijyamo ari nko gukandagira mu muriro. Agaruka ku mpamvu ibitera, anatanga inama y’icyakorwa.
Mu kiganiro uyu munyamakuru yagiranye na InyaRwanda, yasobanuye impamvu yifashishije imbuga nkoranyambaga ze, agereranya imyidagaduro ya none no gukandagira mu muriro.
Ati”Nyine ibyatangiye ari imyidagaduro byarangiye bibaye bibi, kubabazanya, icyo ntecyereza ni uko turi mu bihe bibi, ndatekereza n’abakurikira imyidagaduro barabibona ko tutari mu bihe byiza.”
Anita Pendo yerekana ko ibintu byamaze gufata indi ntera, ati ” Ubu ngubu mu myidagaduro ni nko gukandagira mu muriro pe, ndakubwiza ukuri ikintu icyo aricyo cyose cyaba, buri wese yagutungura.”
Yakomeje agaruka ku bifuza kuyinjiramo cyane abari n’abategarugori, agira ati”None bazi ko ari paradizo bagiyemo, mu kuri buri kintu cyose kigira ingorane zacyo, ariko navuze ngo iki gihe turimo kirimo guhangana ko hejuru, noneho abantu baragabanaho ibitero mu buryo bweruye.”
Muri iki kiganiro kandi yagarutse ku cyemezo cyo gusezera RBA yimukira kuri Kiss Fm yatangiye gukoraho kuwa 9 Nzeri 2024. Avuga ko bitari bimworoheye gusezera muri RBA cyane ko ari ikigo yafataga nk’umuryango yari amazemo igihe kinini ku buryo abo bakoranaga bari barabaye abavandimwe be.
