Ikipe ya APR FC yigirije nkana kuri Gasogi united iyitsinda ibitego 3-0 mu mukino w’umunsi wa 18 wa Shampiyona y’u Rwanda ‘Rwanda Premier League’.
Uyu mukino wabereye kuri Kigali Pele Stadium kuri uyu wa Kabiri, tariki ya 4 Gashyantare 2026.
Umukino wasanze APR iri ku mwanya wa gatatu n’amanota 33, mu gihe Gasogi United ifite umutoza mushya Lukura Charles A Yiekoh yari ku mwanya wa 10 n’amanota 22.
Umusifuzi Kayitare David niwe wasifuye uyu mukino yungirijwe na Mugabo Eric na Mugisha Bonheur.
Kapiteni Niyomugabo Claude ntiyagaragaye mu bakinnyi bifashishwa muri uyu mukino, asimburwa na Bugingo Hakim naho igitambara cya kapiteni gihabwa Ruboneka Jean Bosco.
Ni mu gihe Djibril Ouattara udaruherutse kubanza mu kibuba, yabanjemo afatanya ubusatirizi na Hakim Kiwanuka ndetse na William Togui.
Abayobozi ku ruhande rwa Nyamukandagira bari baje kwihera ijisho uyu mukino barimo umuyobozi w’Icyubahiro Gen Mubarakh Muganga, ni mu gihe ku ruhande rwa Gasogi United, Perezida wayo Kakooza Nkuliza Charles [KNC], ari kumwe na Mutabaruka Angelbert bakorana nabo bari bitabiriye uyu mu kino.
Umukino watangiye APR ihererekanya neza umupira isatira izamu rya Gasogi United, ishaka itsinzi kare, iyi kipe yashoboraga gufungura amazamu hakiri kare, ariko ihusha uburyo bukomeye ku munota wa 5′.
Ku munota wa 12′ Hakim Kiwanuka wari wahushije uburyo bwa mbere yakiriye umupira acomekewe mu rubuga rw’amahina awuhindura neza awushyira mu buryo bwe, yohereza mu rushundura igitego cya mbere kiba kiranyoye.
Gufungura amazamu kare byafashije APR FC gukomeza kuyobora umukino, gusa Gasogi United nayo mu minota 15 y’umukino yatangiye gushaka uburyo bwo kwinjira mu rubuga rw’amahina rwa APR FC, ndetse abakinnyi bagerageza gushotera imipira kure ariko ntibyagira icyo bitanga.
Umuzamu Leandre wa Gasogi United yakomeje kubera ibamba ba rutahizamu ba APR FC, yari ibari bubi mu minota 30 y’umukino, aho yakuyemo imipira 3 y’ibitego byabazwe.
Ku munota wa 39′ w’umukino APR FC yanditse igitego cyayo cya kabiri cyatsinzwe na Rouaf Memel Dao.
Iminota yakurikiyeho abasore ba APR FC wabonaga bafite inyota nyinshi yo gutsinda ibitego bakomeje kotsa igitutu ba myugariro ba Gasogi United. Igice cya Mbere kirangira APR FC yibitseho ibitego 2-0 bwa Gasogi United.
Igice cya Kabiri, Gasogi United yagitangiranye impinduka aho Muhindo Collin yahaye umwanya Hakizimana Adolphe.
Nubwo APR FC yari ifite ibitego bibiri, yakomeje gukina ishaka izamu ngo yongere umubare w’ibitego, isatira binyuze mu mpande za Djibril Ouattara na Hakim Kiwanuka.
Iyi minota ntiyari yoroshye kuri APR kuko yari isigaye ari abakinnyi 10, nyuma y’ikarita y’umutuku yahawe Yussif Daoda Seidu ku munota wa 57′ akiniye nabi mugenzi we.
Ku munota wa 69′, APR FC yakoze iminduka, aho William Mel Togui yahaye umwanya Ngaboziza Pacifique. Bidatinze APR FC yabonye Penaliti yatewe neza na Djibril Ouattara yandika utaherukaga kunyeganyeza inshundura, yandika igitego cya gatatu cya APR FC, Gasogi ikomeza kwibura.
APR FC yahise ikora impinduka, Roauf Memel Dao aha umwanya Mugisha Gilbert ‘Barafinda’, mu gihe Byiringiro Jean Gilbert ‘Kagege’ yahaye umwanya Ombolenga Fitina.
APR yayoboye neza iminota isigaye, umukino urangira itsinze Gasogi Unied ibitego 3-0, yegukana amanota atatu ya mbere mu mu mikino yo kwishyura ya Shampiyona.
Aya manota yafashije APR FC kuyobora urutonde rw’agateganyo rwa Shampiyona n’amanota 36 irusha inota Al Hilal, mu gihe Police ifite 33 itarakina na AS Kigali, umukino uteganyijwe kuri iki Cyumweru tariki 8 Ugushyingo 2026.
Mu mikino itanu iheruka guhuza aya makipe muri Shampiyona, yanganyije itatu, APR FC itsinda ibiri, mu gihe Gasogi United itatsindamo n’umwe, uheruka wabaye ku wa 20 Ukuboza 2025, warangiye APR FC itsinze 2-0.
APR FC iritegura Bugesera FC mu gihe izakurikizaho imikino ikomeye cyane irimo uwo izacakirana na Al Hilal, Kiyovu, Police FC, na Gorilla FC yose iri muri uku kwezi kwa Gashyantare.
Gasogi itatirimutse ku rutonde rwa Shampiyona, yo iritegura gukina na AS Muhanga kuri iki Cyumweru igakurikizaho Mukura VS&L, Amagaju na Al Merrikh muri uku Ugushyingo.
Undi mukino utegerejwe cyane kuri uyu munsi wa 18, ni uzahuza Rayon Sports na AS Kigali kuri uyu wa kane tariki ya 5 Gashyantare 2026 kuri Kigali Péle Stadium, na wo washyizwe ku isaha a saa cyenda z’amanywa.
